მთავრობამ და საჯარო უწყებებმა 2026 წლის მეორე კვარტალში Facebook-სა და Instagram-ზე რეკლამებში 130 562 დოლარი დახარჯეს. ორგანიზაცია “სამართლიანი არჩევნები” Meta-ს პლატფორმებზე 1 აპრილიდან 29 ივნისის ჩათვლით პერიოდში განთავსებული პოლიტიკური და სოციალური რეკლამების ანალიზს აქვეყნებს.
“Meta-ს პლატფორმებზე საქართველოს აუდიტორიისთვის განთავსებული პოლიტიკური რეკლამების ხარჯები, წინა კვარტალთან შედარებით, 2026 წლის აპრილი-ივნისის პერიოდში 5.9%-ით გაიზარდა; მთლიანი სარეკლამო ხარჯების 43% პარტია „ქართულ ოცნებასა“ და მის წარმომადგენლებზე მოდიოდა, ხოლო 38% – მთავრობისა და საჯარო უწყებების გვერდებზე;
წინა კვარტალთან შედარებით, „ქართულმა ოცნებამ“ და მისმა წევრებმა 1 აპრილიდან 29 ივნისის ჩათვლით Meta-ს პლატფორმებზე 47%-ით მეტი ღირებულების რეკლამები განათავსეს, ხოლო სამთავრობო გვერდებმა მიმდინარე წლის მეორე კვარტალში 34%-ით მეტი სარეკლამო დანახარჯი გასწიეს, ვიდრე ამავე წლის იანვარი-მარტის პერიოდში;
„ქართული ოცნების“ სატელიტი პარტიების სარეკლამო დანახარჯები, წინა კვარტალთან შედარებით, 3.7-ჯერ გაიზარდა;
დიდი ბრიტანეთის მიერ დაწესებული სანქციების შემდეგ ტელეკომპანია „იმედის“ სარეკლამო აქტივობა Meta-ს პლატფორმებზე სრულად შეწყდა. მეორე დასანქცირებული ტელევიზიის, „პოს ტვ“-ის, სახელით რეკლამები აღარ გამოქვეყნებულა, თუმცა ტელეკომპანიის ერთ-ერთი გადაცემის ფეისბუქგვერდზე რეკლამები შეზღუდული ოდენობით მაინც განთავსდა;
Meta-ს პოლიტიკურ რეკლამებზე ქართული პარტიების მიერ გაწეული სარეკლამო დანახარჯების 84%-ზე მეტი „ქართულ ოცნებასა“ და მის წარმომადგენლებზე მოდიოდა” – ნათქვამია ISFED-ის ანგარიშში.