უკრაინის საგარეო საქმეთა მინისტრმა, ანდრეი სიბიგამ დამარწმუნა, რომ ირანულ გემზე თავდასხმა უნებლიე იყო და უკრაინა ესკალაციისკენ არ ისწრაფვის, – ამის შესახებ ირანის საგარეო საქმეთა მინისტრი აბას არაღჩი სოციალურ ქსელში წერს.
როგორც არაღჩი აღნიშნავს, ესკალაციისკენ არც ირანი ისწრაფვის.
„თუმცა მკაფიოდ განვაცხადეთ, რომ ჩვენს მოქალაქეებზე ან ჩვენს ინტერესებზე ნებისმიერი თავდასხმა მიუღებელია. ზარალი აუცილებლად უნდა ანაზღაურდეს“, – წერს არაღჩი.
მანამდე უკრაინის საგარეო საქმეთა მინისტრმა, ანდრეი სიბიგამ განაცხადა, რომ გულწრფელი სატელეფონო საუბარი ჰქონდა ირანელ კოლეგასთან და არაღჩისთან საუბრისას ხაზი გაუსვა ორ ქვეყანას შორის „არასაჭირო ესკალაციის“ თავიდან არიდების აუცილებლობას.
ცნობისთვის, უკრაინამ რამდენიმე დღის წინ კასპიის ზღვაში გემზე იერიში მიიტანა. უკრაინული მხარის განცხადებით, ქვეყნის დრონებმა კასპიის ზღვაში დაარტყეს ორ რუსულ გემს, რომლებსაც სამხედრო ტვირთი გადაჰქონდათ. უკრაინის მტკიცებით, ორივე გემი ირანიდან რუსეთის ერთ-ერთი პორტისკენ მიემართებოდა. ირანული მხარე კი ირწმუნება, რომ იერიში განხორციელდა ირანის ერთ-ერთ კომერციულ გემზე, რომელსაც რკინის ტვირთი გადაჰქონდა. აღნიშნული თავდასხმის შედეგად ერთი მეზღვაური დაიღუპა, სამი კი დაშავდა.