პოლონეთში უკრაინელი წყვილის ცემაში ეჭვმიტანილი ორი კაცი დააკავეს, შემთხვევა ვროცლავში 26 ივლისს მოხდა.
უკრაინელი ქალი და მამაკაცი საავადმყოფოში გადაიყვანეს.
27 ივლისს პოლონეთის შინაგან საქმეთა მინისტრმა მარჩინ კერვინსკიმ განაცხადა, რომ დაკავებულთაგან ერთი ვროცლავის დატოვებას ცდილობდა.
უკრაინის საგარეო საქმეთა მინისტრის მოვალეობის შემსრულებელმა ანდრი სიბიჰამ პოლონეთს მადლობა გადაუხადა ეჭვმიტანილების ოპერატიულად დაკავებისთვის. სიბიჰას განცხადებით, მოელიან სრულ, ობიექტურ და მიუკერძოებელ გამოძიებას, დანაშაულის ყველა გარემოებისა და მოტივის დადგენას და დამნაშავეთა სამართლიანად დასჯას.
ირკვევა, რომ მაღაზიიდან გამოსულ უკრაინელ წყვილს სავარაუდოდ, „აქცენტის გამო“ რამდენიმე მამაკაცი აედევნა და როცა ავტომობილში ჩაჯდომას აპირებდნენ, კაცი მიწაზე დააგდეს და ფიზიკურად გაუსწორდნენ, იძალადეს ქალსაც, რომელიც დახმარებას ითხოვდა.
დაშავებულებს ტვინის შერყევა დაუდგინეს. ქალს ყურზე ქირურგიული ჩარევაც დასჭირდა.