იდენტიფიცირებულია პოლიციის მაღალჩინოსანი, რომელსაც აქტივისტები ძალადობაში ადანაშაულებენ. ახალგაზრდების თქმით, სწორედ დავით მამაგეიშვილი გასცემდა გუშინ მათი დაკავების ბრძანებებს.
მოქალაქეები, რომლებიც თორნიკე თოშხუას მხარდასაჭერ აქციას მართავდნენ, ამბობენ, რომ ეს იყო მშვიდობიანი აქცია, რომელიც პოლიციამ ძალადობრივად დაშალა. მათი თქმით, სამართალდამცველები არც ახალგაზრდა გოგონებს ინდობდნენ და მათ თმით ითრევდნენ, ხოლო სტუდენტ ბიჭებს სახეში გამეტებით ურტყამდნენ.
აქტივისტები ამბობენ, რომ გუშინდელმა ინციდენტმა მათ რუსული პოლიცია მოაგონათ.
მობრუნდა პოლიციელი და ჩემს უკან გოგო იყო, იმას სწვდა თმაში ხელით, რაც მე დავინახე ძალიან კარგად, ეს იყო ძალადობა და თმით ცდილობდა,რ ომ გაეთრია მანქანისკენ, რისი საშუალებაც ჩვენ არ მივეცით და საბოლოოდ, მოუწია ხელის გაშვება. ეს იყო, როგორც მე მითხრეს, მამაგეიშვილი დავითი, პოლიციის უფროსია, როგორც ვიცი. რუსეთს მახსენებს, რაც კადრები ვნახე, როცა იყო რუსეთში შეტაკებები ოპოზიციური მხარის და პოლიციის შორის, ზუსტად ასეთი კადრები იყო, სადაც ქალებს, ახალგაზრდებს, ბავშვებს მათ შორის, ასე მიათრევდა პოლიცია, – ამბობს ქალი აქტივისტი.
გუშინ მამაგეიშვილმა ერთ სტუდენტს, რომელიც არაფერ შუაში არ იყო და არც ბანერი ეჭირა და არაფერს აკეთებდა, მივარდა უცბად და სილა გააწნა საკმაოდ დიდი ძალით და ამ დროს ჩააყენეს კორდონში და დააკავეს ადამიანი. ამის ამსახველი არაერთი კადრი არსებობს. ასევე დააკავეს გოგონები, ფიზიკურად გაუსწორდნენ ორ გოგონას, რომლებსაც ზედ შეაჯდნენ და გაუსწორდნენ ამ ქალბატონებს, – ამბობს კიდევ ერთი აქტივისტი.
„ბიძინა“ და სამი ასოს კომბინაცია – ამ ბანერით გამოკითხვის ჩატარებას თბილისის საკრებულოსთან მოქალაქეთა მასობრივი დაკავება მოჰყვა. მიუხედავად იმისა რომ ბანერზე გვარი დაკონკრეტებული არ იყო, პოლიციაm ის შეურაცხყოფად მიიჩნია და ჯამში ათი ადამიანი დააკავა.
ადგილზე ვითარება იმდენად დაძაბული იყო, რომ ღამით საკრებულოსთან სალომე ზურაბიშვილი მივიდა.