რუსეთმა ხარკოვიდან პოლტავამდე მონაკვეთზე მდებარე ბენზინგასამართი სადგურები სრულად გაანადგურა. ამის შესახებ ხარკოვის საოლქო საბჭოს დეპუტატი ალექსანდრ სკორიკი აცხადებს. მისი თქმით, ვითარება ყოველდღიურად უარესდება.
„დღეისთვის ხარკოვი-კიევის ავტომაგისტრალზე ყველა ავტოგასამართი სადგური სრულად განადგურებულია, მათ შორის ვალკის დასახლებაში, ქალაქ ჩუტოვოსა და პოლტავის მიმართულებით მდებარე სადგურები“, – განაცხადა სკორიკმა.
მისივე ინფორმაციით, ბოლო ბენზინგასამართი სადგური, რომელიც ვალკის დასახლებაში ფუნქციონირებდა, რუსეთმა 26 ივლისს გაანადგურა.
საერთო ჯამში, რუსული ძალების იერიშების შედეგად, ქვეყნის მასშტაბით მწყობრიდან გამოვიდა 200-ზე მეტი ავტოგასამართი სადგური, მათგან 80 ხარკოვის ოლქში მდებარეობს. თუმცა, დეპუტატის თქმით, საწვავის ბაზარზე კრიზისი არ შეინიშნება.