თელავში, სასტუმროში ქორწილის მიმდინარეობისას მომხდარ ინციდენტთან დაკავშირებით დაკავებული გიორგი ჭიღლაძის ადვოკატი ლაშა კაპანაძე აღნიშნავს, რომ სასტუმრო Agarani Estate-ის ადმინისტრაციამ მზაობა გამოთქვა გირაოს თანხის გადახდასთან დაკავშირებით და დიდი ალბათობით გადაიხდიან.
მისივე თქმით, გიორგი ჭიღლაძე მადლობას უხდის ქართველ ხალხს.
„სასამართლოს გადაწყვეტილებით მოხარული ვარ. გიორგი ჭიღლაძე მადლობას უხდის ქართველ ხალხს, რომელიც გვერდში უდგას, ჟურნალისტებს, რომლებიც მოვლენებს აშუქებენ და ხალხს აწვდიან ინფორმაციას საქმეზე… სასტუმროს ადმინისტრაციამ მზაობა გამოთქვა გირაოს თანხის გადახდასთან დაკავშირებით და დიდი ალბათობით, გადაიხდიან.
სასტუმროს რაც შეეხება, სამწუხაროდ, მომხდარი ფაქტის შემდეგ არის ზარი 112-ში შესული. სასტუმროს ნაწილში, შესაძლებელი იყო მომხდარიყო დროული პრევენცია. როგორც ვიცი, საკუთარი ძალებით ეცადნენ“, – განაცხადა კაპანაძემ.
კითხვას, საპროცესო შეთანხმებას განიხილავს თუ არა, ადვოკატი პასუხობს: „საქმის სტრატეგიიდან გამომდინარე, ჯერ ამ საკითხზე არ ვისაუბრებ, მაგრამ გამორიცხული არ არის არაფერი“.
რაც შეეხება იმას, „იყო თუ არა კონფლიქტის გაღვივების მიზეზი რუსულად საუბარი“, ადვოკატი ამბობს: „არანაირი! მიზეზი იყო პროვოკაციული ქცევა, სხვადასხვა სითხის გადმოსხმა და შეურაცხმყოფელი კომენტარები. ჩვენ ყველას პატივს ვცემთ, სტუმარსაც, სტუმარმა არ უნდა მოაწყოს პროვოკაცია“,- აღნიშნა ადვოკატმა.
ინფორმაციისთვის, სასტუმრო Agarani Estate-ში ქორწილის მიმდინარეობის დროს მომხდარი ინციდენტის საქმეზე დაკავებულ გიორგი ჭიღლაძეს აღკვეთის სახით 5000-ლარიანი გირაო შეეფარდა. აღნიშნული გადაწყვეტილება თელავის რაიონული სასამართლოს მოსამართლემ, თამარ კაპანაძემ მიიღო. მან პროკურატურის შუამდგომლობა ნაწილობრივ დააკმაყოფილა და გიორგი ჭიღლაძე სხდომათა დარბაზიდან გაათავისუფლა.
პროკურატურა ჭიღლაძის მიმართ 5000-ლარიანი საპატიმრო გირაოს გამოყენებას შუამდგომლობდა, დაცვის მხარე კი, მხოლოდ გირაოს სანაცვლოდ გათავისუფლებას.
ცნობისთვის, ინციდენტი 18 ივლისს, თელავის მუნიციპალიტეტის სოფელ რუისპირში მდებარე სასტუმროში მოხდა. ქორწილის სტუმრებსა და სასტუმროში მყოფ რუს ტურისტებს შორის სიტყვიერი დაპირისპირება ფიზიკურში გადაიზარდა.
უფრო კონკრეტულად, რუსეთის მოქალაქეებმა სასტუმროს ნომრის აივნიდან შეურაცხყოფა მიაყენეს ქორწილში მყოფ პირებს და წყალი დაასხეს აპარატურას, რის შემდეგაც ბრალდებულმა ფიზიკური დაზიანება მიაყენა ერთ-ერთ ქალს. თავის მხრივ, ბრალდებულიც მიუთითებს ყელის არეში დაზიანებაზე. მომხდარის გამო სამართალდამცავებმა გიორგი ჭიღლაძე დააკავეს. მას ბრალი სისხლის სამართლის კოდექსის 120-ე მუხლის პირველი ნაწილით წარუდგინეს, რაც ჯანმრთელობის განზრახ მსუბუქ დაზიანებას გულისხმობს.