ხმაურია ამ წუთებში თელავის რაიონულ სამმართველოში, სადაც ბოლო რამდენიმე საათია კახეთში სასტუმროში მომხდარი ფიზიკური დაპირისპირების საქმეზე მოწმეებს ჰკითხავდნენ. სიტუაცია მას შემდეგ დაიძაბა, რაც განყოფილებაში ხელმეორედ დაიბარეს მომღერალი ალექსანდრე მრელაშვილი, რომელიც განყოფილებაშივე დააკავეს.
ადვოკატების ინფორმაციით, პოლიცია ინციდენტის თვითმხილველებს აკავებს. ინტერესების დამცველი ამბობს, რომ ადგილზე მიიყვანეს რუსი ტურისტების ადვოკატი, რომელიც მოწმეების ჩვენებებს უსმენდა. სწორედ ამის შემდეგ მოითხოვეს მოწმეების ხელახლა გამოკითხვა.
ადგილზე მისულმა მუსიკოსმა ალექსანდრე მრელაშვილმა, რომელიც პოლიციის განყოფილებაში მეორე მივიდა, თქვა, რომ ის უკვე გამოკითხული იყო, რის შემდეგაც ის დააკავეს.
შეგახსენებთ, რომ კახეთში რუსმა ქალებმა ქორწილის სუფრას ნომრის ფანჯრიდან წყალი გადაასხეს, რასაც მხარეებს შორის დაპირისპირება მოჰყვა. ამის შესახებ სოციალურ ქსელში თვითმხილველებმა დაწერეს.
არსებული ინფორმაციით, ნომერში რუსებს გაბრაზებული ქართველი კაცი აუვარდა და ერთ-ერთს ხელი დაარტყა.
შსს-ს ინფორმაციით, ახალგაზრდა კაცი უკვე დაკავებულია. არსებული ინფორმაციით, რუსი ტურისტების მიმართ რაიმე სახის სანქცია გამოყენებული არ ყოფილა.