ირაკლი კობახიძე ამტკიცებს, რომ ევროკავშირი საქართველოს ბოლო წლებში ფინანსურად არ დახმარებია – “ოცნების” ლიდერი დღეს ტელეკამერების წინ ირწმუნებოდა, რომ ევროპა ქართულ ეკონომიკას მხოლოდ წინა ხელისუფლების პერიოდში ეხმარებოდა ფულადი სახსრებით.
ცნობისთვის, გუშინ ევროკავშირის წარმომადგენლობამ საქართველოში გაასაჯაროვა ინფორმაცია იმის შესახებ, თუ რა სარგებელი მიიღო ქვეყანამ მრავალმილიონიანი დახმარებით, რომელიც წლები ხმარდებოდა კერძო და საჯარო სექტორის და სამოქალაქო საზოგადოების გაძლიერებას.
არის ქვეყნები, რომელთა რეალური დახმარებაც შეუძლია ევროპულ ბიუროკრატის, თუმცა ისინი ამას არ აკეთებენ. როდესაც გინდა ქვეყანას დაეხმარო, ფული უნდა ჩაასხა ამ ქვეყნის ეკონომიკაში, ეს ნიშნავს შესაბამისი ქვეყნის გაძლიერებას, რაც ერთადერთხელ გააკეთა ამერიკის ძველმა ადმინისტრაციამ და ევრობიუროკრატიამ, ეს იყო 2009-2011 წლები, როდესაც ომის შემდგომ იყო უმძიმესი ეკონომიკური ვითარება და აგენტურა, სააკაშვილის რეჟიმი იყო გადასარჩენი. ერთადერთი შემთხვევა როდესაც ეკონომიკაში ფული ჩაასხეს, იყო 2009-2011 წლები. 2009-2011 წლებისა [გარდა], როცა უცხოური აგენტურა იყო გადასარჩენი, ამ ქვეყანაში არც ერთხელ და არცერთ სხვა შემთხვევაში, ეკონომიკაში ფული არ ჩაუსხამთ. თან საქართველო მცირე ქვეყანაა. ჩვენი ეკონომიკა მთლიანად 38 მილიარდი დოლარია, ამაზე ბევრად ნაკლები იყო წლების წინ, საქართველოს ფეხზე დაყენებას არაფერი სჭირდებოდა, ისევე როგორც მოლდოვის დაყენებას არ ჭირდება არაფერი და ამ დროს მოლდოვაში უმძიმესი და კრიზისული ვითარებაა. ბოლო სამი წლის განმავლობაში მოლდოვის რეალური ეკონომიკა ჯამურად შემცირდა, ბოლო 5 წლის განმავლობაში 13.5 მილიარდი დოლარით გავზარდეთ სხვაობა საქართველოსა და მოლდოვის ეკონომიკებს შორის”.- განაცხადა კობახიძემ.