ღვინის ეროვნული სააგენტოს მხარდაჭერით და სააგენტოს კონტრაქტორი კომპანიის, Vinoveli Inc-ის ორგანიზებით, ამერიკის შეერთებული შტატების ქალაქ ნიუ იორკში, როკფელერების ცენტრში ქართული ღვინის პრეზენტაცია-დეგუსტაცია და ბიზნესფორუმი გაიმართა. ინფორმაციას ამის შესახებ ღვინის ეროვნული სააგენტო ავრცელებს.
სააგენტოს ცნობით, ღონისძიებას ღვინის ბლოგერები, იმპორტიორები, მედიის, HoReCa (სასტუმრო-კაფე-რესტორანი) და კომერციული სექტორების წარმომადგენლები დაესწრნენ. მათ შესაძლებლობა მიეცათ, დაეგემოვნებინათ ქართული ღვინის მწარმოებელი კომპანიების სხვადასხვა სახეობის 40-მდე ბოთლი ღვინო.
„მსგავსი ფორმატის აქტივობები ემსახურება ქართული ღვინის პოპულარიზაციას, მომხმარებელთა ინტერესის ზრდასა და აშშ-ის ბაზარზე ქართული ღვინის ცნობადობისა და კონკურენტუნარიანობის გაძლიერებას.
ღონისძიებების მიმდინარეობისას ვიზიტორებმა დააგემოვნეს სხვადასხვა სახეობის პრემიუმ ხარისხის ქართული ღვინო, მიიღეს ინფორმაცია ქართული ღვინის 8000-წლიანი მემკვიდრეობის, ადგილობრივი ვაზის ჯიშების მრავალფეროვნებისა და ქვევრის ღვინის დაყენების ტრადიციული ტექნოლოგიის შესახებ.
ამერიკის შეერთებული შტატები ქართული ღვინისთვის ერთ-ერთ სტრატეგიულ ბაზარს წარმოადგენს, სადაც მაღალია როგორც ხარისხის მოთხოვნები, ისე კონკურენციის დონე. ბოლო წლებში ღვინის ეროვნული სააგენტოს მხარდაჭერით განხორციელებულმა არაერთმა მარკეტინგულმა ღონისძიებამ მნიშვნელოვნად შეუწყო ხელი ქართული ღვინის ცნობადობისა და ექსპორტის ზრდას ამერიკის ბაზარზე.
აღსანიშნავია, რომ აშშ-ის ბაზარი ქართული ღვინისთვის ერთ-ერთ ყველაზე მაღალფასიან სეგმენტს წარმოადგენს, სადაც ერთი ლიტრი ქართული ღვინის საშუალო საექსპორტო ფასი დაახლოებით 6 აშშ დოლარს შეადგენს“, – ნათქვამია ღვინის ეროვნული სააგენტოს მიერ გავრცელებულ ინფორმაციაში.