ე.წ. საბოტაჟის საქმეზე ოპოზიციონერი ლიდერების წინააღმდეგ სასამართლოში ჩვენებებს დღეს „ერთიანი ნეიტრალური საქართველოს“ წევრები – ნანა კაკაბაძე, ვატო შაქარიშვილი, ლევან ნიკოლეიშვილი, ბიძინა გიორგობიანი და გელა ნიკოლაიშვილი მისცემენ.
ყველა მათგანი პროკურატურის მოწმეა და სწორედ მათი სარჩელის საფუძველზე დაიწყო გამოძიება. პროკურატურამ. ე.წ. მტკიცებულებებად ნეიტრალური საქართველოს წევრებმა ოპოზიციონერების საჯარო სივრცეში გაკეთებული განცხადებები წარადგინეს.
ე.წ. საბოტაჟის საქმეზე ბრალი მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს აქვს წარდგენილი. უფრო კონკრეტულად, გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-დან 15- წლამდე თავისუფლების აღკვეთას გულისხმობს.