თელავის მუნიციპალიტეტში სტიქიის ზონაში ზარალს ითვლიან. განსაკუთრებით მძიმე მდგომარეობაა სოფელ წინანდალში, სადაც ძლიერი წვიმისა და ღვარცოფის შედეგად ათობით ჰექტარი ვენახი განადგურდა.
დაზარალებული გლეხები აცხადებენ, რომ მათთან შესაბამისი უწყებების წარმომადგენლები ამ დრომდე არ მისულან. მათი თქმით, არ იციან, რა ფორმით მოხდება ზარალის ანაზღაურება და როგორ შეძლებენ განადგურებული მოსავლის ფონზე საბანკო ვალდებულებების შესრულებას.
“აი, ამ ტერიტორიას, რასაც უყურებთ, დაახლოებით 10 ჰექტარი ვენახია განადგურებული. აბა, რა ვთქვა, ღამის ოთხი საათი იყო, რომ მოხდა ეს ამბავი, როგორც იძახიან, მე აქ არ ვყოფილვარ. ბიჭები ყვებიან, რომ ხევმა რომ დაიწყო ხმაური, წყალმა რომ დაიწყო გადმოსვლა, უკვე გასაგები გახდა, რომ აქ ყველაფერს წაიღებდა. სრულად განადგურებულია ყველაფერი, მიწაც აღარ არის, რომ რაღაც გააკეთო… პირადად მე არავინ დამკავშირებია, რომ ასე და ასე იქნებაო. სოფლის გამგებელს დავურეკე და კომისია იქნებაო და როდის იქნება არავინ არაფერი იცის” – ამბობს ადგილობრივი.
წინანდალში იმყოფებიან “ლელო – ძლიერი საქართველოს” ლიდერებიც, რომლებიც მოსახლეობას ესაუბრნენ.
“მოსახლეობას დაუზიანდა ვენახები, ფაქტობრივად განადგურებულია, არაფერი აღარ არსებობს, მიწაც აღარ ვარგა სამომავლოდ რომ რამე გაშენდეს. საქმე ის არის, რომ მოსახლეობა უჩივის უყურადღებობას, ხელისუფლების წარმომადგენლები ჯერჯერობით არ გამოჩენილან ადგილზე, მხოლოდ ზოგადი ინფორმაცია გვაქვს, რომ კომუნიკაცია ჰქონდათ და დაჰპირდნენ, რომ მიხედავენ, მაგრამ რა კუთხით და როგორ, რა ჩართულობა იქნება , არ იციან” – ამბობს თელავის საკრებულოს წევრი, “ძლიერი საქართველოს” თელავის ორგანიზაციის თავმჯდომარე ლევან ბერძენაშვილი.
შეგახსენებთ, რომ კახეთში ძლიერმა წვიმამ თელავის ხევი კალაპოტიდან გადმოიყვანა და ქალაქის რამდენიმე ქუჩა დატბორა.