მოსამართლე გიორგი გელაშვილმა ალეკო ელისაშვილი სასამართლო პროცესიდან გააძევა – ოპოზიციონერ პოლიტიკოსს მოსამართლემ მამუკა მდინარაძე და ირაკლი კობახიძის უშვერი სიტყვებით ხსენება არ აპატია.
“ვიცით სადაც ვართ, ვიცით რაშიც ვმონაწილეობთ, აბსოლუტურად ფორმალურია ეს ყველაფერი და წინასწარ გადაწყვეტილი იმდენად, რომ დღესაც კობახიძემ დილიდან, არიქა გელაშვილი [მოსამართლე] არ შეტორტმანდეს გადაწყვეტილებაშიო, ახსენა, რომ ელისაშვილი ტერორისტიაო… […] ჩემთვის მთავარია, მამაჩემი და ჩემი შვილები ამაყობდნენ ჩემით და კობახიძის და მდინარაძის დედაც მოვ**ან. უკრაინას და საქართველოს გაუმარჯოს და დედის ტ**ნა რუსეთს” – თქვა ალეკო ელისაშვილმა სასამართლო პროცესზე.
ელისაშვილის საბოლოო სიტყვის შემდეგ მოსამართლემ დარბაზიდან გააძევა როგორც ელისაშვილი, ისე პროცესზე დამსწრე პირები, რომლებმაც ელისაშვილის მიმართვის შემდეგ ტაში დაუკრეს და ოვაციები გამოხატეს. ამ წუთებში თბილისის საქალაქო სასამართლოში მოსამართლე გიორგი გელაშვილი სათათბიროდაა გასული. დღეს მის საქმეზე განაჩენის გამოცხადებაა მოსალოდნელი
ალეკო ელისაშვილს ბრალდება საქართველოს სისხლის სამართლის კოდექსის 19-323-ე მუხლის პირველი ნაწილით ჰქონდა წარდგენილი, რაც ტერორისტული აქტის ჩადენის მცდელობას გულისხმობს. აღნიშნული ქმედება სასჯელის სახედ და ზომად 10-დან 15-წლამდე თავისუფლების აღკვეთას ითვალისწინებს. ალეკო ელისაშვილს ბრალდება კიდევ ერთ ეპიზოდზე სისხლის სამართლის კოდექსის 323-ე მუხლის პირველი ნაწილით აქვს წარდგენილი, რაც ტერორისტულ აქტს, ესე იგი აფეთქებას, ცეცხლის წაკიდებას, ადამიანზე თავდასხმას, იარაღის გამოყენებას ან სხვა ქმედებას გულისხმობს ჩადენილს ტერორისტული მიზნით, რომელიც ადამიანის სიცოცხლის მოსპობის, მნიშვნელოვანი ქონებრივი ზიანის, ან სხვა მძიმე შედეგის განხორციელების საშიშროებას ქმნის. აღნიშნული ქმედება 10-დან 15 წლამდე ვადით თავისუფლების აღკვეთას გულისხმობს.