ოკუპირებულ აფხაზეთში ქართველების გენოციდის ერთ-ერთი მონაწილე, აფხაზი სეპარატისტი გენერალ-მაიორი ვალერი ხაგბა მოკვდა – მას “აფხაზეთის გმირის” წოდება ჰქონდა მინიჭებული. ინფორმაცია და გამოსამშვიდობებელი ტექსტი ოკუპირებული რეგიონის ე.წ. თავდაცვის სამინისტრომ გაავრცელა:
“ვალერი ხაგბამ უდიდესი წვლილი შეიტანა აფხაზეთის რესპუბლიკის შეიარაღებული ძალების შექმნასა და ჩამოყალიბებაში, იყო თავდაცვის სახელმწიფო კომიტეტის წევრი. სხვადასხვა წლებში იგი ღირსეულად ასრულებდა საპასუხისმგებლო ამოცანებს შეიარაღებული ძალების სარდლის მოადგილის პოზიციაზე, თავდაცვითი მრეწველობის კომიტეტის თავმჯდომარისა და თავდაცვის მინისტრის მოადგილის პოსტებზე შეიარაღებისა და ტექნიკის მიმართულებით.
„აფხაზეთის გმირის“ უმაღლესი წოდება, საბრძოლო სახელმწიფო ჯილდოები და თანამებრძოლების აღიარება მისი სამშობლოს წინაშე არსებული გამორჩეული დამსახურების უტყუარი დასტურია” – აცხადებს საოკუპაციო რეჟიმი.
ხაგბა 1992-1993 წლების ომის დროს იყო სეპარატისტთა „თავდაცვის სახელმწიფო კომიტეტის“ წევრი. ეს ორგანო უშუალოდ გეგმავდა და ხელმძღვანელობდა სამხედრო ოპერაციებს, რომელთა მიზანიც, ტერიტორიების დაკავებასთან ერთად, ქართული მოსახლეობის მასობრივი დეპორტაცია, ეთნიკური წმენდა და განადგურება იყო.