საქართველოს მთავრობის მიერ ახლად შექმნილმა “ცენტრალურმა შემსყიდველმა ორგანომ“ ავტომობილების შესაძენად კიდევ ერთი ტენდერი გამოაცხადა.
როგორც სახელმწიფო შესყიდვების სააგენტოს ვებგვერდზე გამოქვეყნებულ ინფორმაციაშია ნათქვამი, ცენტრალური შემსყიდველი ორგანო 164 ერთეული ჰიბრიდული ავტომობილის შეძენას გეგმავს, შესყიდვის სავარაუდო ღირებულება კი 10 159 800 ლარია.
ამასთან, დოკუმენტაციის მიხედვით, ავტოსატრანსპორტო საშუალებების მიწოდება უნდა განხორციელდეს ხელშეკრულების გაფორმებიდან 240 კალენდარული დღის განმავლობაში.
რაც შეეხება ავტომობილების ტექნიკურ მახასიათებლებს, შემოთავაზებული ავტომობილები უნდა იყოს ახალი, არაუადრეს 2026 წლის გამოშვების, მარცხენა საჭიანი, ექსპლუატაციაში არმყოფი (გარბენი არაუმეტეს 200კმ), ნივთობრივად და უფლებრივად უნაკლო და განბაჟებული. ამასთან, მიმწოდებელმა საკუთარი ხარჯებით უნდა უზრუნველყოს ავტომანქანების შემსყიდველზე გადაფორმება.
მსურველებისთვის წინადადების მიღება 1-ელ ივლისს დაიწყება და და 2 ივლისს დასრულდება.
ცნობისთვის, საქართველოს მთავრობის მიერ ახლად შექმნილმა “ცენტრალურმა შემსყიდველმა ორგანომ” ავტომობილების შესაძენად ტენდერი22 ივნისსაც გამოაცხადა. დოკუმენტაციის მიხედვით, უწყებას 47.3 მლნ ლარად 595 ახალი, 2026 წელს გამოშვებული ავტომობილი უნდა ეყიდა.