„ფლამინგოს“ რაკეტებით ვოლგოგრადში საარტილერიო სისტემების საწარმოზე დარტყმა განხორციელდა, – ინფორმაციას უკრაინის პრეზიდენტი, ვოლოდიმირ ზელენსკი ავრცელებს.
„რუსეთის ყველა თავდაცვის ობიექტი, რომელიც უკრაინის წინააღმდეგ ომს ემსახურება, ჩვენი შორ მანძილზე მოქმედი „სანქციების“ სამართლიანი სამიზნეა. ღამით, FP-5 „ფლამინგოს“ ტიპის რაკეტებით წარმატებული დარტყმა განხორციელდა ვოლგოგრადში მდებარე „ტიტან-ბარიკადის“ საწარმოზე. ეს მსხვილი სამრეწველო კომპლექსია, სადაც მტერი აწარმოებს საარტილერიო სისტემებსა და სპეციალიზებულ სამხედრო აღჭურვილობას, მათ შორის რაკეტების გამშვები სისტემების კომპონენტებს, რომლებიც ჩვენი ხალხის წინააღმდეგ თავდასხმებისთვის გამოიყენება“, – წერს ზელენსკი X-ზე.
ზელენსკის ცნობით, სარაკეტო დარტყმის შემდეგ საწარმოს ტერიტორიაზე ხანძარი გაჩნდა.
„უკრაინის შორ მანძილზე მოქმედი „სანქციების“ არეალი კვლავ ფართოვდება. სწორედ ჩვენი ზეწოლაა, რომელიც, დღითი დღე, ღირსეული მშვიდობისთვის ნიადაგს ამზადებს“, – აცხადებს უკრაინის პრეზიდენტი.