ამ პერიოდის განმავლობაში არაერთხელ ვიყავი საოკუპაციო ხაზთან კამერების გარეშე, – ასე უპასუხა ირაკლი კობახიძემ „გახარია საქართველოსთვის” დეპუტატის, ქეთევან ბაკარაძის კითხვას, რამდენჯერ იყო ნამყოფი საოკუპაციო ხაზთან.
კობახიძემ ყოველწლიური ანგარიშის წარდგენისას, კითხვა-პასუხის დროს, ოკუპირებულ ტერიტორიებზე საუბრისას აღნიშნა, რომ როგორც წინა ხელისუფლების დროს, ასევე გიორგი გახარიას პრემიერ-მინისტრობის პირობებში ქვეყნის ტერიტორიების ანექსია მოხდა.
„რაც შეეხება ანექსიას, რატომღაც ძალიან დიდი ენთუზიაზმით საუბრობთ თქვენ ამ თემაზე. მე შემიძლია გითხრათ, რა არის ჩვენი მიდგომა და ჩვენი პოლიტიკა. ჩვენ გვაქვს ძალიან პრინციპული მიდგომა ოკუპაციის საკითხთან დაკავშირებით და ზოგადად, შედეგებით იზომება ხელისუფლების პოლიტიკა და რომ შევადაროთ წინა ხელისუფლებას, ძალიან კარგად ვხედავთ, რა იყო შედეგები მაშინ და რა არის ახლა, მათ შორის, რუსეთთან მიმართებით, რა იყო მათი არაპრაგმატული პოლიტიკის შედეგები.
შედეგები იყო რუსეთის ინტერვენცია საქართველოში, მათი ტერიტორიული წარმომადგენლობის გაფართოება ჩვენს ქვეყანაში და ასევე მათი ეკონომიკური ინტერვენცია.
ჩვენი ხელისუფლების პირობებში გვაქვს სრულიად განსხვავებული შედეგები, არავითარი გაფართოება ტერიტორიული წარმომადგენლობის. ერთადერთი მძიმე შემთხვევა გვქონდა ამ კუთხით, ეს იყო შემთხვევა ჩორჩანაში, რაც ვისი „დამსახურებაც” არის, ძალიან კარგად მოგეხსენებათ. სხვა შემთხვევაში ჩვენ პრინციპულად ვიცავდით ბოლომდე ჩვენს ინტერესებს და ამის შედეგია ის, რომ ქვეყნის ეროვნული ინტერესები არის ბოლომდე დაცული.
ამას შეფასებაც არ სჭირდება, ჩორჩანაში შეუჩერებიათ ბორდერიზაცია. ამაზე რა კომენტარი უნდა გავაკეთო არ ვიცი, არავითარ კომენტარს ეს არ იმსახურებს”, – განაცხადა ირაკლი კობახიძემ.