ლოტკინზე მომხდარის შესახებ არასამთავრობო ორგანიზაცია სამოქალაქო მონაწილეობის ცენტრის ხელმძღვანელი ირაკლი აბესაძე სოციალურ ქსელში პოსტს აქვეყნებს:
“სკვერი სადაც დღეს ბავშვს რკინის კონსტრუქცია დაეცა კახა კალაძემ 2021 წლის 29 იანვარს გახსნა და მისი მოწყობა 681,574 ლარი დაჯდა.
სამუშაოები აწარმოა შპს ,,პე-ბე”-მ.
იგივე კომპანია ახორციელებდა სოფელ ნიქოზში სტადიონის რეაბილიტაციას, სადაც 2023 წლის 24 სექტემბერს ბავშვს დენმა დაარტყა. ბავშვი საბედნიეროდ გადარჩა. საინტერესოა, თუ ჩატარდა მაშინ სრულყოფილი გამოძიება და რა შედეგით დასრულდა ის?
საბავშვო სივრცეები ბავშვების სიცოცხლისთვის საშიშია (ამას სამწუხაროდ გამონაკლისი შემთხვევები უკვე აღარ ეთქმის), ხოლო პასუხისმგებელი არავინ?!
რადგან შემთხვევა სკვერის გახსნიდან 5 წლის შემდეგ მოხდა, როგორც ჩანს, მის მიმდინარე მოვლა-პატრონობას გამგეობა სათანადოდ არ ახორციელებდა, თუმცა თავიდანვე რამდენად ხარისხიანად იყო სამუშაოები შესრულებული ესეც შესასწავლია.
მერიის რომელი რგოლიც უნდა სცოდავდეს პასუხისმგებელი კალაძეა ან თავად გადაწყვიტოს ვისმა უპასუხისმგებლობამ (სულ მინიმუმ) დააყენა ბავშვის სიცოცხლე რისკის წინაშე და დააკისროს ეს პასუხისმგებლობა (თანამდებობრივი პირველ რიგში).” – წერს ირაკლი აბესაძე.
გუშინ ნაძალადევის რაიონის გამგეობამ გაავრცელა ინფორმაცია, რომ 22 ივნისს ლოტკინზე, კიშინიოვის ქუჩაზე მდებარე სკვერში მოზარდებმა კონსტრუქცია დააზიანეს, ატრაქციონი ბავშვს დაეცა და მძიმე დაზიანება მიიღო. ადგილობრივების ინფორმაციით, 14 წლის გოგონა მძიმე მდგომარეობაშია და კომაში იმყოფება.