“ქართული ოცნების” დეპუტატი თურნავა თბილისში მყოფ რუს მილიარდერ დუროვთან ერთად გადაღებულ ფოტოებს აქვეყნებს – გავრცელებული ინფორმაციით, დუროვი მაისში კომპანია Tether-ის საინვესტიციო პროექტის პრეზენტაციაზე იყო ჩამოსული. ოცნების დეპუტატმა ვაკო თურნავამ დუროვთან ერთად ფოტოები მაშინაც გამოაქვეყნა.
გლობალური კრიპტო-ინდუსტრიის ერთ-ერთმა ლიდერმა, კორპორაცია “ტეზერმა” საქართველოს მთავრობასთან ერთად, ახალი ფინანსური ინსტრუმენტის პროექტი ლარის სტეიბლკოინი, სახელწოდებით GELt 25 მაისს წარადგინა. პრეზენტაციაზე სიტყვით გამოვიდა ირაკლი კობახიძეც.
Telegram-არხმა Ateo Breaking-მა გაავრცელა ინფორმაცია, რომ რუსი მილიარდერი და Telegram-ის დამფუძნებელი პაველ დუროვი თბილისშია. Telegram-ისა და ВКонтакте-ს დამფუძნებელი და რუსი მილიარდერი პაველ დუროვი, რომელმაც საფრანგეთის მოქალაქეობა 2021 წელს მიიღო, 2024 წლის 25 აგვისტოს პარიზის ლე ბურჟეს აეროპორტში დააკავეს. დუროვს 12 დანაშაულს ედავებიან, მათ შორისაა სამართალდამცავი ორგანოების მიერ გამოძიებისთვის საჭირო ინფორმაციის მიწოდებაზე უარის თქმა, კიბერდანაშაული, ფულის გათეთრება და კრიპტოლოგიური მოწყობილობის იმპორტი წინასწარი დეკლარაციის გარეშე, თუმცა ის 29 აგვისტოს 5 მილიონი ევროს სანაცვლოდ გაათავისუფლეს. დუროვზე სამართლებრივი დავა საფრანგეთში დღემდე გრძელდება, ის პატიმრობიდან გაათავისუფლებს, თუმცა ქვეყნის დატოვების უფლება მხოლოდ სპეციალური ნებართვის საფუძველზე შეუძლია. ის ამ დროისთვის დუბაიში ცხოვრობს, თუმცა საფრანგეთში მის წინააღმდეგ არსებული გამოძიების გამო, საერთაშორისო დონეზე გადაადგილება შეზღუდული აქვს.