ნიგერის ჩრდილოეთ ნაწილში, საჰარის უდაბნოში, მძიმე ჰუმანიტარული ტრაგედია მოხდა. ადგილობრივი ხელისუფლების ინფორმაციით, იზოლირებულ ტერიტორიაზე ჩარჩენის შედეგად 49 ადამიანი წყურვილით გარდაიცვალა, გადარჩენა კი მხოლოდ ორმა მგზავრმა შეძლო.
მედიის ცნობით, სატვირთო ავტომობილი, რომლითაც მგზავრები გადაადგილდებოდნენ, მექანიკური გაუმართაობის გამო გაჩერდა სასაზღვრო ქალაქ ასამაკადან 80 კილომეტრზე მეტ მანძილზე, ნიგერის, მალისა და ალჟირის საზღვართან მდებარე უდაბნოს შორეულ მონაკვეთში.
აგადესის რეგიონის ხელისუფლებამ მომხდარს „ნამდვილი ჰუმანიტარული კატასტროფა“ უწოდა. მათი ინფორმაციით, სატვირთო მანქანა მალის ქალაქ ტელჰანდეკადან გამოვიდა, ხოლო მგზავრების უმეტესობა საკუთარ დასახლებებში ბრუნდებოდა, რათა ოჯახებთან ერთად რელიგიურ დღესასწაულს დასწრებოდა.
რამდენიმედღიანი მგზავრობის შემდეგ ავტომობილმა, სავარაუდოდ, მარშრუტი დაკარგა და საბოლოოდ ტექნიკური პრობლემის გამო გაჩერდა. მძღოლისა და მგზავრების მცდელობა, მანქანა ხელახლა აემუშავებინათ, უშედეგო აღმოჩნდა.
ტრაგედია იმანაც გაამწვავა, რომ ადგილი, სადაც ავტომობილი გაჩერდა, სრულიად მოკლებული იყო წყლის წყაროებს, თავშესაფარსა და ნებისმიერ ინფრასტრუქტურას. მგზავრები საჰარის ერთ-ერთ ყველაზე მკაცრ და არასტუმართმოყვარე რეგიონში აღმოჩნდნენ, სადაც მაღალი ტემპერატურა და წყლის დეფიციტი სასიკვდილო საფრთხეს ქმნის.
გადარჩენილმა ორმა ადამიანმა დახმარების საძებნელად 50 კილომეტრზე მეტი გზა ფეხით გაიარა. მათ საბოლოოდ წყალსატევს მიაღწიეს, შემდეგ კი ასამაკაში ჩავიდნენ და მომხდარის შესახებ ხელისუფლებას აცნობეს.
სამაშველო ჯგუფებმა შემთხვევის ადგილზე მისვლისას სატვირთო ავტომობილის გარშემო და მის ქვეშ ათობით გარდაცვლილი აღმოაჩინეს. ადგილზე მიმოფანტული იყო ტანსაცმელი და პირადი ნივთები. მსხვერპლთა ნაწილი უდაბნოში მასობრივ საფლავებში დაკრძალეს.
აღსანიშნავია, რომ ეს ტერიტორია საჰარის ერთ-ერთი მნიშვნელოვანი სატრანზიტო დერეფანია, რომელიც ნიგერს მალის, ალჟირსა და ლიბიასთან აკავშირებს. ამ მარშრუტით ყოველწლიურად ათასობით ადამიანი სარგებლობს, მათ შორის სეზონური მუშები, ვაჭრები, ოქროს მომპოვებლები და სხვადასხვა ქვეყნის მოქალაქეები, რომლებიც რეგიონში გადაადგილდებიან.