გარდაცვლილი ნინი მუჯირის ოჯახი აცხადებს, რომ ექიმს, რომელმაც 35 წლის ქალს პირველ სამშობიარო კლინიკაში ოპერაცია გაუკეთა, ლიცენზია არ ჰქონდა – ცოტახნის წინ ხმაური და დაპირისპირება იყო პირველ სამშობიარო კლინიკასთან. ოჯახის წევრები ახალგაზრდა ქალის გარდაცვალებაში ექიმებს ადანაშაულებენ. ინფორმაციას “TV პირველი” ავრცელებს.
“დაღუპეს, მოკლეს, დაჩეხეს. არაფერი არ დააკლდა ამ გოგოს. ექიმი რომელმაც ოპერაცია გაუკეთა დღესდღეობით იმას იძახის მე არ გამიკეთებიაო. ვის მოვთხოვო პასუხი? კლინიკის დირექტორს, კი ბატონო აქ ვზივარ კაბინეტში, გაიპარა წავიდა, იმის გამო, რომ იმ ექიმს ვითხოვ აქ მოვიდეს, რომ პასუხი მოვთხოვო” – ამბობს გარდაცვლილი ქალის ოჯახის წევრი TV პირველთან.
“10 წუთით ადრე გადაიღო ვიდეო სანამ შევიდოდა ყველაფერი მშვენივრად იყო. გაიკეთა, 5 წუთში გვირეკავს ცუდად ვარო, ინტოქსიკაცია მომივიდა, მე მგონი ვირუსი მქონდაო. შემოწმების გარეშე გააკეთეს ოპერაცია, რომელსაც არ სჭირდებოდა ანესთეზია. არ ვიცი, რა გაუკეთეს მოკლეს. ეს საავადმყოფო არის დასახური და პირადად ეკატერინე გაგუას საერთოდ უნდა ჩამოერთვას მუშაობის უფლება. ეს არის მკვლელი” – ამბობს ნინი მუჯირის ოჯახის წევრი.
35 წლის ნინი მუჯირი გუშინ გარდაიცვალა. მუჯირმა საშვილოსნოს პოლიპის მოწვის ოპერაცია 12 იანვარს გაიკეთა, 3 საათში კი გაითიშა და კომაში ჩავარდა. ქალს ორგანიზმში ბაქტერია ლეპტოსპიროზი აღმოაჩნდა, რის შემდეგაც სეფსისი განუვითარდა.