მოსკოვის საავიაციო კვანძის ოთხივე აეროპორტი – შერემეტიევო, დომოდედოვო, ვნუკოვო და ჟუკოვსკი დაკეტილია – როსავიაცია აცხადებს, რომ აეროპორტებმა მუშაობა უსაფრთხოების მიზნით, უპილოტო საფრენი აპარატების თავდასხმის გამო შეაჩერეს.
გასული ღამიდან მოყოლებული მოსკოვის აეროპორტებში ფრენები უკვე მესამედ შეიზღუდა.
შერემეტიევოს აეროპორტის ცნობით, თავდასხმის საფრთხის გამო, მგზავრებისა და აეროპორტის თანამშრომლების ევაკუაცია განხორციელდა როგორც ტერმინალებიდან, ასევე თვითმფრინავების ბორტებიდან. ხალხი თავშესაფრებში, მათ შორის მიწისქვეშა პარკინგებზე გადაიყვანეს – განაცხადეს აეროპორტის თანამშრომლებმა. რეისების ნაწილი გაუქმდა, ხოლო ზოგიერთი თვითმფრინავი სათადარიგო აეროპორტებში გადამისამართდა.
ხუთშაბათს ღამით, მოსკოვსა და მოსკოვის ოლქზე, რომლის ტერიტორიაზეც ოთხივე აეროპორტი მდებარეობს, უკრაინული დრონების ყველაზე მასირებული თავდასხმა განხორციელდა.დღევანდელი თავდასხმა ბოლო ორი წლის განმავლობაში ყველაზე მასშტაბური იყო. უკრაინამ რუსეთს 500-ზე მეტი დრონით შეუტია.