გარკვეულწილად ირანმა გაიმარჯვა, მაგრამ ირანელი ხალხი დამარცხდა, იმიტომ რომ რეჟიმი უფრო მკაცრი და დაუნდობელი გახდა მათ მიმართ – ამის შესახებ კონფლიქტოლოგმა პაატა ზაქარეიშვილმა “მეტრონომთან” საუბრისას განაცხადა.
“ყველაფერი შეიძლება მოხდეს ირანსა და ამერიკის შეერთებულ შტატებს შორის, როგორც ურთიერთობის დარეგულირება, ასევე მათ შორის კონფლიქტის განმეორება. ახლა ისეთ სიტუაციაში ვართ, რომ შემდეგი ნაბიჯი შეიძლება იყოს ნებისმიერი. ისრაელი როგორ მოიქცევა? როგორ მიიღებს ამ შეთანხმებას?
ფაქტია, რომ ამერიკელები, ტრამპის სახით, მიხვდნენ, რომ წინდაუხედავი ნაბიჯი გადადგეს, როცა ასე დაუფიქრებლად დაიწყეს ირანის დაბომბვა. ამით კიდევ უფრო გააძლიერეს ანტიჰუმანური, ანტიადამიანური რეჟიმი ირანში; კიდევ უფრო მეტად დამძიმდა ვითარება ირანელი ხალხისთვის, მაგრამ გაძლიერდა ირანის რეჟიმი.
პრაქტიკულად, ირანმა მოახერხა ჰორმუზის სრუტის ჩაკეტვა და მსოფლიოში ენერგოკრიზისის გამოწვევა, განსაკუთრებით ამერიკაში, რადგან ამერიკელები მიხვდნენ, რომ ეს არ იყო სწორი ნაბიჯი. ახლა კი ცდილობენ უკან დაიხიონ ნელ-ნელა, რათა ტრამპი მოემზადოს ნოემბრის შუალედური არჩევნებისთვის, რათა რესპუბლიკურმა პარტიამ ამ მიზეზით არ წააგოს.
მე მგონი, ამერიკელები ხვდებიან არასწორ ნაბიჯებს და ასწორებენ მათ. ირანი კი ამას თავის გამარჯვებად თვლის. გარკვეულწილად ირანმა გაიმარჯვა, მაგრამ ირანელი ხალხი დამარცხდა, იმიტომ რომ რეჟიმი უფრო მკაცრი და დაუნდობელი გახდა მათ მიმართ” – განაცხადა პაატა ზაქარეიშვილმა.