სამუშაო შეხვედრამ, რომელიც დაახლოებით 2 საათი და 30 წუთი მიმდინარეობდა, 10 წლის ანკას დედას კითხვები ვერ გაუფანტა. მოზარდის დედისთვის არც იმ ბოდიშების მთელი სერიაა საკმარისი, რომელსაც თითქმის ყოველ ჯერზე თავის მართლება მოჰყვებოდა.
ერთ-ერთი პირველი, ვინც 10 წლის ანკას და მის ოჯახს ბოდიში მოუხადა, გადაცემის წამყვანი, ლიზა ბაგრატიონი იყო. მომღერალი ამტკიცებდა, რომ ხმა, რომელიც ჩანაწერის ბოლოში ისმის რომ ბავშვი დაეცა მას არ ეკუთვნის.
სამუშაო სხდომა ბორდის ოფიციალური გვერდიდან პირდაპირ ეთერში გადაიცემოდა. შეხვედრაზე იმ გადაცემის შემოქმედებითი გუნდის წევრები იყვნენ, რომელშიც მოზარდმა გონება დაკარგა, თუმცა, სხდომას არ ესწრებოდა გენერალური დირექტორი – ბერძენიშვილი. მთელი შეხვედრა იმაზე საუბარს დაეთმო, რომ გოგონას წაქცევა არ დაუნახავთ, თუმცა, ერთ მომენტში მათივე კადრებშიც ჩანს, რომ ბავშვი მოწყვეტით ეცემა. გაჟღერდა ურთიერთგამომრიცხავი პოზიციებიც.
სხდომის მიმდინარეობისას, გამოიკვეთა, რომ ტელევიზიის გულგრილობაზე კითხვები არა მხოლოდ საზოგადოებას, არამედ მაუწყებლის თანამშრომლებსაც აქვთ. პირველი არხი დისკრიმინაციაში ღიად, პირდაპირ ეთერში ამხილა მათივე მემონტაჟემ.