ცნობილი ხდება, რომ დიდუბეში, ქურდიანის ქუჩაზე მომხდარი დაპირისპირების შედეგად კიდევ ერთი ადამიანია დაჭრილი. ტვ პირველის ინფორმაციით, ის 24 წლის გიორგი ველიჯანაშვილია. ველიჯანაშვილი გლობალმედის კლინიკაში გულ-მკერდისა და ფეხის არეში, 2 ცეცხლნასროლი ჭრილობით შეიყვანეს. მას ოპერაცია ჩაუტარდა.
მეორე დაჭრილი კი ამ დროისათვის კლინიკა ჰელსიკორშია მოთავსებული.
ჯერჯერობით უცნობია მომხდარის დეტალები, თუმცა ადგილობრივების ინფორმაციით, ღამით ჩხუბისა და სროლის ხმა გაიგეს. დაღუპულია ნიკა ქარელაშვილი, რომელსაც ასევე ჭრილობები ჰქონდა მიყენებული. ის საცხოვრებელი კორპუსის მეშვიდე სართულიდან გადავარდა, თუმცა არსებობს ვერსია, რომ გადააგდეს. დაპირისპირება სწორედ ქარელაშვილის საცხოვრებელ ბინაში მოხდა.
შსს-მ გამოძიება 236-ე და 19-109-ე მუხლებით დაიწყო, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებასა და ორი ან მეტი პირის მიმართ დამამძიმებელ გარემოებებში ჩადენილი განზრახ მკვლელობის მცდელობას გულისხმობს. როგორც უწყებაში განმარტავენ, სამართალდამცველების მიერ ინციდენტში მონაწილე ყველა პირი იდენტიფიცირებულია და პოლიციის განყოფილებაში იმყოფება.