ახალი დეტალები თბილისის ცენტრში მომხდარი მკვლელობისა და დაჭრის საქმეზე – “ტვ პირველის” ინფორმაციით, დიდუბეში, ქურდიანის ქუჩაზე დაჭრილი ერთ-ერთი პირი 24 წლის გიორგი ველიჯანაშვილია. ის კლინიკა “გლობალ-მედშია” მოთავსებული.
როგორც “ტვ პირველს” კლინიკაში განუცხადეს, პაციენტს ცეცხლსასროლი იარაღით მიყენებული 2 ჭრილობა, გულმკერდისა და ფეხის არეში აღენიშნებოდა. ახალგაზრდა კაცს ოპერაცია უკვე ჩაუტარდა.
ირკვევა ისიც, რომ ველიჯანაშვილთან ერთად ქურდიანის ქუჩაზე დაიჭრა კიდევ ერთი პირი, რომელიც კლინიკა “ჰელსიკორშია” მოთავსებული. მისი მდგომარეობა მძიმედ ფასდება.
“ტვ პირველის” ინფორმაციით, ერთ-ერთი პირი, რომელიც მოკლული ნიკა ქარელაშვილის სახლში დაიჭრა, ადგილზე დაცვის თანამშრომლების თანხლებით მივიდა.
სისხლიანი ანგარიშსწორება დიდუბეში 14 ივნისს მოხდა. “ტვ პირველის” ინფორმაციით,35 წლის ნიკა ქარელაშვილს საკუთარ საცხოვრებელ სახლში ესროლეს.
მეზობლები ამბობენ, რომ გაიგეს რამდენიმე გასროლის ხმა. ცნობილია, რომ სროლის შემდეგ ახალგაზრდა ფანჯრიდან – მე-7 სართულიდან გადმოვარდა, ან გადმოაგდეს.
შსს-მ გამოძიება ორი მუხლით დაიწყო:
სსკ-ის 236-ე – ცეცხლსასროლი იარაღის მართლსაწინააღმდეგო შეძენა-შენახვა-ტარება;
სსკ-ის 19-109 – ორი ან მეტი პირის მიმართ, დამამძიმებელ გარემოებებში ჩადენილი განზრახ მკვლელობის მცდელობა.