რუსული ავიაკომპანია Red Wings-ი ზაფხულის სეზონზე საქართველოს მიმართულებით ფრენებს უკვე რუსეთის 15 ქალაქიდან ახორციელებს. ავიაკომპანიამ საზაფხულო პროგრამა გააფართოვა და მიმდინარე თვეში ბათუმის მიმართულებით პირდაპირი რეისები ერთბაშად 6 ახალი ქალაქიდან დაამატა.
“ბათუმი კიდევ უფრო ამყარებს თავის პოზიციებს, როგორც რუსი მოგზაურების საყვარელი მიმართულება საზაფხულო დასვენებისთვის. ამის ყველაზე თვალსაჩინო დასტური რუსული ავიაკომპანია Red Wings-ის გაფართოებული საზაფხულო ფრენების პროგრამაა. მიმდინარე თვეში, საქართველოს მთავარი კურორტის მიმართულებით, რუსეთის ფედერაციის სხვადასხვა ქალაქიდან ექვსი ახალი მარშრუტი გაიხსნა. ამიერიდან ბათუმი პირდაპირი ავიამიმოსვლით არის დაკავშირებული ვოლგოგრადთან, ორენბურგთან, პერმთან, სარატოვთან, ტიუმენსა და ჩელიაბინსკთან. საერთო ჯამში კი, 2026 წლის საზაფხულო სეზონის ფარგლებში, ავიაკომპანია Red Wings-ი საქართველოს მიმართულებით ფრენებს რუსეთის 15 ქალაქიდან ახორციელებს.“ – ნათქვამია შვეიცარიის საელჩოში რუსეთის ინტერესების სექციის განცხადებაში.