საზოგადოებრივი მაუწყებლის ეთერში მომხდართან დაკავშირებით ბავშვის ბებია, ნინო კუხალეიშვილი სოციალურ ქსელში პოსტს აქვეყნებს:
“ბევრი თქვენგანი მეკითხებით ანკას მდგომარეობას და პირად შეტყობინებებსაც მწერთ. აქვე მინდა ყველას გულწრფელი მადლობა გადაგიხადოთ, ჩემო ძვირფასებო!
ვხედავ, როგორ შეგაწუხათ ბავშვის მდგომარეობამ და იმ გულგრილობამ, რომელიც ამ ყველაფერს ახლდა. მინდა გითხრათ, რომ ეს ამბავი მხოლოდ ანკასთვის არ ყოფილა მძიმე. დარწმუნებული ვარ, იმ ბავშვებზეც არანაკლებ იმოქმედა, ვინც ამ ყველაფრის მოწმე გახდა. ეს იყო უფროსების არასწორი რეაგირების შედეგი და ძალიან მძიმე გაკვეთილი ყველასთვის.
ღმერთის წყალობით, ანკა ნორმალურად არის. დაცემისას თითები იტკინა, უკვე დაუფიქსირეს და ყველა აუცილებელი კვლევა ხვალისთვის აქვს ჩანიშნული, რათა სრულად გამოირიცხოს ნებისმიერი გართულება.
მძიმე სანახავია ეს ყველაფერი, მაგრამ აუცილებელიც. უნდა ვიცოდეთ, რა გარემოში გვყავს ჩვენი შვილები და შვილიშვილები, რა შეიძლება მოხდეს მოულოდნელად და როგორი რეაგირება შეიძლება ჰქონდეს ადამიანების გარკვეულ ნაწილს ასეთ დროს.
ამიტომ, კიდევ ერთხელ მინდა ვთქვა, ძალიან დიდი სიფრთხილე, ყურადღება და პასუხისმგებლობა გვმართებს ბავშვებთან მიმართებაში.
მადლობა თითოეულ თქვენგანს თანადგომისთვის, გულშემატკივრობისთვის და იმ სითბოსთვის, რასაც უგზავნით ჩემს ანკას” – წერს ნინო კუხალეიშვილი.