“მართლმსაჯულების სახლის” დამფუძნებელი, ეკა ბესელია ირაკლი კობახიძის ბრიფინგს გამოეხმაურა, სადაც პრემიერ-მინისტრმა ბიძინა ივანიშვილი 27-ჯერ ახსენა.
ეკა ბესელიას თქმით, მას დარჩა შთაბეჭდილება, რომ აღნიშნული ბრიფინგი ირაკლი კობახიძის გამოსამშვიდობებელი ტექსტივით იყო.
მისივე თქმით, ის, რომ ირაკლი კობახიძე ბრიფინგის ტექსტს კითხულობდა და ზეპირად არ გადმოსცემდა, მიანიშნებს, რომ ტექსტი ბიძინა ივანიშვილთან იყო შეთანხმებული.
… სერიოზული შეშფოთების საგანია ის, რომ ამ მთელი კონტექსტის გათვალისწინებით, ამ ამბების წაკითხვა უწევდა მას. ეს არ იყო ბრიფინგი, რომელსაც ატარებდა კობახიძე, ბევრი რამე შეიძლება დააბრალო, მაგრამ ზეპირად საუბარი შეუძლია. მაგრამ დღეს რომ შპარგალკით საუბრობდა ბრიფინგზე, ანუ კითხულობდა მთლიანად ტექსტს, რომ არ შეშლოდა, ეს იმას ნიშნავს, რომ ის ტექსტი გავლილი იყო ბიძინა ივანიშვილთან, დარწმუნებული ვარ და ეს ტექსტი იყო შეთანხმებული, რომელიც მას უნდა წაეკითხა.
კიდევ ერთი საინტერესო ქვეტექსტი იყო ამ ბრიფინგის დროს – ერთი წინადადებით, სადაც [კობახიძე] ყვებოდა როგორ მიიღება გადაწყვეტილებები, ეს იყო საინტერესო, ამ თხრობის დროს, ხომ ყველამ ისედაც იცის, რომ გადაწყვეტილებების მიღება ვერტიკალურად ხდება და არა ჰორიზონტალურად და ამ ვერტიკალურ სისტემაში რომც არ ეთქვა კობახიძეს, რომ ბიძინა ივანიშვილი იღებს საბოლოო გადაწყვეტილებასო, ეს ხომ ისედაც ცნობილია, მაგრამ მან ეს ღიად და პირდაპირ საჯაროდ თქვა.
ეს ნაწილი მგონია, რომ იყო კობახიძის ნაწილი მხოლოდო და მხოლოდ ამ ბრიფინგში, ყველა დანარჩენი ალბათ უფრო იყო შეთანხმებული ტექსტი… თავის გამოსამშვიდობებელი ტექსტივით კი იყო. პირველი რეაქცია მართლა ეგ მქონდა,” – განაცხადა ეკა ბესელიამ.
ცნობისთვის, ირაკლი კობახიძემ 7 წუთიანი ბრიფინგი მთლიანად ბიძინა ივანიშვილს მიუძღვნა – “ქართული ოცნების” ლიდერმა პარტიის საპატიო თავმჯდომარის სახელი და გვარი 27-ჯერ ახსენა.
“ქართული ოცნების” მოქმედმა თავმჯდომარემ სპეციალურად ჩანიშნულ ბრიფინგზე, თქვა რომ ის მმართველ პარტიაში მეორე პირია. აღნიშნა, რომ ბიძინა ივანიშვილთან ერთად, პერიოდულად იმართება გუნდის ლიდერების შეკრება, სადაც პოლიტიკის საკვანძო საკითხები განიხილება, სადაც კობახიძის თქმით, “ბიძინა ივანიშვილის აზრი იმარჯვებს”.