აზერბაიჯანელი ჟურნალისტი აფგან სადიგოვი, – რომელიც საქართველოდან აზერბაიჯანში გააძევეს, – აზერბაიჯანში დააკავეს იმავე საქმეზე, რომლის საფუძველზეც აზერბაიჯანი მის ექსტრადიციას ითხოვდა.
ამ საქმეზე სტრასბურგის სასამართლოს გაცემული ჰქონდა დროებითი ღონისძიება – სადიგოვის ექსტრადიცია ჰქონდა აკრძალული, სანამ თავად დაასრულებდა საქმის განხილვას.
საქართველოს შსს სადიგოვის გაძევებისას ამბობდა, რომ აზერბაიჯანის პროკურატურამ იმ საქმეზე, რომელზეც სტრასბურგის სასამართლოს გაცემული ჰქონდა დროებითი ღონისძიება, სისხლისსამართლებრივი დევნა შეწყვიტა, ამიტომ საქართველოშიც შეწყდა საექსტრადიციო პროცედურები.
თუმცა, შსს-ს თანახმად, სადიგოვმა „ჩაიდინა ადმინისტრაციული სამართალდარღვევა“ და ამის გამო გააძევეს. სადიგოვის ადვოკატი, „სოციალური სამართლიანობის ცენტრის“ დირექტორი თამთა მიქელაძე წერს, რომ სადიგოვის იმავე საქმეზე დაკავება კარგად აჩვენებს, რომ „ეს პროცესი წინასწარ დაგეგმილი, კოორდინირებული და ფაბრიკაციული სპეცოპერაცია იყო, რომელშიც „ქართული ოცნების“ რეჟიმიც ღიად მონაწილეობდა“.