იტალიის ქალაქ ანკონაში პოლიციამ საქართველოს 35 წლის მოქალაქე დააკავა, რომელიც ავსტრიის მიერ გაცემული ევროპული დაკავების ორდერის საფუძველზე იძებნებოდა. ინფორმაციას იტალიური სააგენტო ANSA ავრცელებს.
გავრცელებული ცნობით, მამაკაცი ანკონას რკინიგზის სადგურის მიმდებარე ტერიტორიაზე, პოლიციის მიერ ჩატარებული ტერიტორიის კონტროლის ღონისძიებების ფარგლებში დააკავეს. სამართალდამცველებმა ის რუტინული შემოწმების დროს შეაჩერეს, რის შემდეგაც დამატებითი გადამოწმებისთვის პოლიციის განყოფილებაში გადაიყვანეს.
გამოძიების ინფორმაციით, დაკავებულს ავსტრიაში ჩადენილი ქურდობის საქმეზე ეძებდნენ. ბრალდების მიხედვით, 35 წლის ქართველმა თანამზრახველთან ერთად ერთ-ერთ საცხოვრებელ ბინაში შეაღწია და დიდი ოდენობით ძვირფასი ნივთები გაიტაცა.
მოპარული ნივთების საერთო ღირებულება 30 000 ევროს აღემატება. გამოძიების მასალების თანახმად, ბინიდან წაღებულია ნაღდი ფული, ოქროს მონეტები და სხვადასხვა სახის ძვირფასი სამკაულები.
იტალიური მედიის ცნობით, მამაკაცი ანკონას პოლიციის „Squadra Volanti“-ს თანამშრომლებმა დააკავეს. ყველა აუცილებელი პროცედურის დასრულების შემდეგ იგი ანკონას სასჯელაღსრულების დაწესებულებაში გადაიყვანეს.
დაკავებული ამჟამად ავსტრიის სამართალდამცავი ორგანოების განკარგულებაშია და უახლოეს პერიოდში გადაწყდება მისი ავსტრიაში ექსტრადირების საკითხი.