საქართველოში თხევადი გაზი გაძვირდა – როგორც ბიზნესპრესნიუსს თხევადი აირის ასოციაციის ხელმძღვანელმა, ნიკა ხოფერიამ განუცხადა, ბოლო 3-4 თვის განმავლობაში ერთ ლიტრზე ფასმა 20-30 თეთრით მოიმატა. როგორც თხევადი აირის ასოციაციის ხელმძღვანელი ვარაუდობს, გამორიცხული არ არის, მომდევნო თვის განმავლობაში, პროდუქციის ღირებულება კიდევ გაიზარდოს – “შესაძლოა, ფასი კიდევ 5-10 თეთრით გაიზარდოს”.
„რუსეთმა საექსპორტო ბაჟი დააწესა. ბუნებრივია, იმპორტიორებმა წინასწარ იცოდნენ, რომ მომდევნო თვიდან ეს რეგულაცია ამოქმედდებოდა და გადასახადი გაიზრდებოდა. შესაბამისად, მათ წინა თვეში გაცილებით დიდი რაოდენობის პროდუქცია შეუკვეთეს, რამაც იმპორტის მაჩვენებლის ზრდა გამოიწვია.
საიმპორტო ფასი სწორედ იმიტომ გაიზარდა, რომ დაწესდა საექსპორტო გადასახადი, რომელიც ერთ მეტრულ ტონაზე 130 დოლარს შეადგენს. შესაბამისად, ფასმაც აიწია. გარდა ამისა, თავად რუსეთის შიდა ბაზარზე მოქმედმა ქარხნებმაც გააძვირეს პროდუქცია, რასაც შემდეგ დაემატა რუსეთის ფედერაციის მიერ დაწესებული 130-დოლარიანი ბაჟიც. რა თქმა უნდა, საიმპორტო ფასის ეს ცვლილება ადგილობრივ ბაზარზეც აისახა. ფასი 1.20-1.30 ლარიდან 1.50 ლარამდეა ასული. ეს ზრდა ბოლო 3-4 თვის განმავლობაში მოხდა. სავარაუდოდ, გამორიცხული არ არის, რომ მომდევნო ერთი თვის განმავლობაში ფასი კიდევ 5-10 თეთრის ფარგლებში გაიზარდოს“ – თქვა ხოფერიამ გამოცემასთან.