ოკუპირებული ცხინვალის ე.წ. პრემიერ-მინისტრმა ძამბოლატ თედეევმა თანამდებობა დატოვა, – ინფორმაციას სააგენტო „რეს“-ი ავრცელებს.
სააგენტოს ცნობით, ე.წ. მთავრობის სხდომაზე თედეევმა პირადად წარადგინა განცხადება გადადგომის შესახებ და „პრეზიდენტმა“ ალან გაგლოევმა მისი გადადგომა მიიღო.
„რეს“-ის ინფორმაციით, ახალი „პრემიერ-მინისტრის“ არჩევამდე, მის მოვალეობას თედეევის „პირველი მოადგილე“ კონსტანტინე ჯიოევი შეასრულებს.
„მთავრობა სრულად და მოქმედი კანონმდებლობის შესაბამისად გააგრძელებს ფუნქციონირებას მანამ, სანამ პარლამენტი ახალ პრემიერ-მინისტრს არ დაამტკიცებს“, – აღნიშნულია „რეს“-ის მიერ გავრცელებულ ინფორმაციაში.