გორში პოლიციელების მიერ ნაცემი კაცების ადვოკატს პროკურატურამ გაუთქმელობაზე მოაწერინა ხელი, შესაბამისად დაზარალებულ მხარეს მტკიცებულებებზე საჯაროდ საუბარი აღარ შეეძლებათ.
ინფორმაციას “ტვ პირველი” თავად პაპუნა ლოცულაშვილისა და ლაშა აბისონაშვილის ადვოკატზე, რევაზ რევაზიშვილზე დაყრდნობით ავრცელებს.
ცნობისთვის, გორში, ე.წ. კომბინატის დასახლებაში სამართალდამცავებმა ორი პირი – 29 წლის პაპუნა ლოცულაშვილსი და მის მეგობარი ჯგუფურად სცემეს.
საქმეზე დაკავებულია ექვსი სამართალდამცავი. მათ ბრალდება სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით წარედგინებათ, რაც სამსახურებრივი უფლებამოსილების გადამეტებას გულისხმობს, ჩადენილს ძალადობით. აღნიშნული ქმედება სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს.
ამასთან, გამოძიება დაწყებულია პაპუნა ლოცულაშვილის მიმართაც სისხლის სამართლის კოდექსის 353-ე მუხლით, რაც პოლიციელის მიმართ განხორციელებულ ძალადობას გულისხმობს.