კრემლში აცხადებენ, რომ უკრაინაში მიმდინარე ომის დასრულება სწრაფადაც არის შესაძლებელი. რუსეთის პრეზიდენტის პრესსპიკერის, დიმიტრი პესკოვის განცხადებით, კონფლიქტის შეწყვეტა უკრაინის ხელისუფლების კონკრეტულ ნაბიჯზეა დამოკიდებული.
“რაც შეეხება ზელენსკისა და წლის ბოლომდე ომის დამთავრებას, შესაძლებელია, რომ ომი დღის ბოლომდე დამთავრდეს, როგორც ეს ბევრჯერ გვითქვამს,” განაცხადა პესკოვმა ბრიფინგზე და დაამატა, რომ “ამის მისაღწევად ზელენსკიმ თავის შეიარაღებულ ძალებს რუსული ტერიტორიიდან უკან დახევა უნდა უბრძანოს” – განაცხადა პესკოვმა.
ცნობისთვის, პესკოვი „რუსულ ტერიტორიებად“ მოიხსენიებს უკრაინის დონეცკის, ლუგანსკის, ზაპოროჟიესა და ხერსონის ოლქებს, რომელთა სრული კონტროლი მოსკოვს ამ დრომდე არ აქვს. უკრაინა და საერთაშორისო საზოგადოების უმრავლესობა ამ ტერიტორიების ანექსიას არ აღიარებს და საერთაშორისო სამართლის მიხედვით, აღნიშნული რეგიონები უკრაინის განუყოფელ ნაწილად მიიჩნევა.