ცოტა ხნის წინ პარლამენტის სხდომაზე მინისტრ გივი მიქანაძესა და გახარიას გუნდის წევრებს შორის სიტყვიერი დაპირისპირების მორიგი რაუნდი იყო. განათლების მინისტრმა პარტია “საქართველოსთვის” დეპუტატებს უთხრა, რომ ახლა პოლიციის აკადემიაში უმაღლესი განათლების მიმართულება რომ არ არის, ეს “მათი გაქცეული ლიდერის დამსახურება”.
როგორც განათლების მინისტრმა განაცხადა, გიორგი გახარიამ უმაღლესი განათლება პოლიციის აკადემიაში „ერთი ხელის მოსმით გააუქმა“.
“თქვენმა ღრმად პატივცემულმა ლიდერმა უმაღლესი განათლება პოლიციის აკადემიაში ერთი ხელის მოსმენით გააუქმა – ამის შემდეგ განათლებაზე თქვენ საერთოდ როგორ სვამთ კითხვებს?! დღეს თავიდან იწყება მთელი იმ სისტემის აწყობა, რასაც შეიძლება თვეები და წლები დასჭირდეს.
ძალიან გთხოვთ – ეთიკას მოუხმეთ.
ვიცი, რომ არ მოგწონთ, მაგრამ დღეს მთელმა საზოგადოებამ უნდა იცოდეს, რომ დღეს შს სამინისტროს პოლიციის აკადემიაში უმაღლესი განათლების მიმართულება რომ არ არის და ამ მიმართულებას მინისტრი თავიდან აწყობს, თქვენი გაქცეული ლიდერის გიორგი გახარიას დამსახურებაა”.- განაცხადა მიქანაძემ.