2026 წლის ზაფხულში ბათუმში შეზლონგის ფასი მაქსიმუმ 10, ქოლგის კი 5 ლარი იქნება – ინფორმაციას BMG ავრცელებს. გამოცემის ცნობით, ელექტრონული აუქციონებიდან ირკვევა, რომ 2025 წლის სეზონთან შედარებით, როდესაც შეზლონგის და ქოლგის ღირებულება მაქსიმუმ 5-5 ლარით იყო განსაზღვრული, შეზლონგის ფასი გაორმაგებულია. 2026 წლის ზაფხულის სეზონისთვის გამოცხადებულია 30-ზე მეტი აუქციონი, რომელზეც სანაპირო ზოლის მართვაზე პასუხისმგებელი სსიპ “ბათუმის ბულვარი” მიწას, 1 ნოემბრამდე, იჯარით გასცემს. აუქციონში გამარჯვებული შეიძლება იყოს როგორც იურიდიული, ისე ფიზიკური პირი.
BMG წერს, რომ მოიჯარე ვალდებულია ქონება მხოლოდ დანიშნულებისამებრ გამოიყენოს. მან იჯარით აღებულ სექტორზე უნდა განათავსოს ახალი და უხარვეზო საპლაჟო ინფრასტრუქტურა (შეზლონგი, ქოლგა, მცირე ზომის სანაგვე ყუთი), სადაც 1 ერთეული შეზლონგის ღირებულება დღის განმავლობაში არ უნდა აღემატებოდეს 10 ლარს, ხოლო 1 ერთეული ქოლგის ღირებულება არ უნდა აღემატებოდეს 5 ლარს. ასევე, უნდა განათავსოს საინფორმაციო ბანერი, სადაც მითითებული იქნება ფასები ქართულ და ინგლისურ ენაზე.