Ambebi.ge-სთან გორში პოლიციელების მიერ ნაცემი ერთ-ერთი პირის, ლაშა აბისონაშვილის დედა საუბრობს:
“პაპუნა მუშაობს საქართველოს ბანკში, ჩვენ, ოჯახს გვაქვს ავეჯის ბიზნესი და ჩემი შვილი იყო სამსახურში და აკეთებდა ავეჯის რესტავრაციას. პაპუნა აკითხავდა ხოლმე სამსახურში ლაშას… უწესიერესი ბიჭები არიან. პაპუნა ისეთი განათლებულია, ისეთი მოკრძალებული, ისეთი ღირსეული, რომ იქითაც მოკრძალებით რომ ელაპარაკები.
გუშინ სამსახურიდან გასული იყო პაპუნა შესვენებაზე ლაშასთან, ერთად მიირთვეს საჭმელი და ამის შემდეგ გამოვიდა პაპუნა გარეთ, აღმოჩნდა, რომ მის მანქანას მიუყენეს უკან მანქანა გორის კრიმინალური პოლიციის თანამშრომლებმა. პაპუნას უთქვამს, გამატარეთო, რადგან ეჩქარებოდა სამსახურში, პოლიციელებს თურმე არ მოეწონათ მისი ეს ნათქვამი, რატომღაც შენიშვნად მიიღეს თუ რაღაც და მაგაზე აუშარდნენ, გადმოვიდნენ და დაუწყეს ცემა, მერე ჩემი შვილი გავიდა გასარკვევად რა ხდებოდა და ისიც სცემეს. როგორ გამეტებით ურტყამდნენ, ეს უმძიმესი ფაქტები მთელმა საქართველომ ნახა.
ერთი მოსახლე ცხოვრობს ჩვენი საწყობის თავზე, ის არის ჟურნალისტი ლადო ბიჭაშვილი, რომელიც იყო იმ დროს სახლში და ეძინა. ლადო ამბობს, რომ არაადამიანურმა ღმუილმა გამაღვიძაო, და რომ გავიხედე, ეს სიტუაცია იყოო, საბედნიეროდ მან შეძლო ამ უმძიმესი კადრების გადაღება და ამხილა მოძალადეები… არაადამიანურ გმინვას რომ გაიგებ მეორე სართულზე და თან გძინავს, წარმოიდგინეთ, როგორ ყვიროდა პაპუნა ამ წამების დროს.
იქ იყო ჩემი შვილის კიდევ ერთი მეგობარი, ამ სასტიკი დანაშაულის შემდეგ იმას მოაკითხეს სახლში, ეგონათ, რომ კადრები ჰქონდა მას გადაღებული და ტელეფონს სთხოვდნენ, მაშინვე გამოედევნონ მას და ამ ბიჭს უთქვამს, მე არაფერი არ მაქვსო გადაღებულიო. მერე მალევე უკვე ვირუსულად გავრცელდა ეს უმძიმესი კადრები და უკვე ატვირთული ჰქონია ლადოს…
პაპუნა უპატიოსნესი ბიჭია, ისეთი ბიჭი არ არის, რომ რამე წინააღმდეგობა გაეწია, როგორც გავიგე, აპირებდნენ რომ წამალი ჩაედოთ მისთვის. არადა არანაირი შეხება წამალთან არ აქვს. მშრომელი, განათლებული ბიჭია. ყვიროდნენ თურმე შვიდ წლიან სისხლზე გაუშვიო. უწესიერესი, სამაგალითო, თითით საჩვენებელი ბიჭია, ესენი არიან კანონიერი ყაჩაღები, მეტი არაფერი…” – ამბობს ლაშა აბისონაშვილის დედა.
გუშინ, 27 მაისს, გორიდან გავრცელდა კადრები, სადაც ჩანს, რომ კომბინატის დასახლებაში პოლიციელები მოქალაქეებს ფიზიკურად გაუსწორდნენ და დააკავეს. მოგვიანებით პროკურატურამ გაავრცელა განცხადება, რომ გორში პოლიციელების მხრიდან მოქალაქეებზე ძალადობაზე გამოძიება დაიწყო. საღამოს კი პირი, ვისზეც პოლიციელებმა იძალადეს, დააკავეს. ამის შემდეგ, რამდენიმე საათში, ლოცულაშვილმა გორის წინასწარი მოთავსების იზოლატორი დატოვა და ის კლინიკაში გადაიყვანეს.
ცოტა ხნის წინ პროკურატურამ გაავრცელა განცხადება, რომ მომხდართან დაკავშირებით 6 პოლიციელი დააკავეს.