თბილისში, ვაზისუბანში, მიხეილ გევორქიანის კომპანია ახლა ბრიტანული სანქციების ქვეშაა. მან “პირველებისგან” გაიგო, რომ კრიპტო-კომპანია აქვს და ისიც, რომ რუსეთს სანქციებისთვის გვერდის ავლაში ეხმარებოდა. არადა საჯარო რეესტრის მონაცემების მიხედვით, საქართველოს მოქალაქე გევორგქიანი ორი წელია, ამ ბიზნესშია და კომპანია “ეიაიფორიას” ხელმძღვანელობს.
ბრიტანეთმა ის კრიპტოკომპანიები და უკანონო ფინანსური ქსელები დაასანცქირა, რომელიც რუსეთს ეხმარებოდა და ომის მანქანას ამუშავებდა. კიდევ ერთი ქართული კომპანია ამ სიაში შპს “არვიქსია”. კომპანიის ოფიციალური მფლობელის, თამაზ გარაევიც ვაზისუბანში ცხოვრობს. თამაზ გარეევის მამა ამტკიცებს, რომ მის 26 წლის შვილს კრიპტო ბიზნესი არ აქვს.
გარაევს კომპანია 2024 წელს გადაუფორმეს, ერთი წლით ადრე შპს არვიქსი დავით ნუცუბიძის სახელზე დარეგისტრირდა. ისიც ამტკიცებს, რომ მხოლოდ ფორმალურად გახდა დირექტორი.
“პირველების” ჩაწერილი ეს ინტერვიუები ადასტურებს, რომ საქართველოში რეგისტირებული კომპანიები, რომლებიც რუსეთს სანქციების გვერდის ავლაში ეხმარებოდა, ფიქტიურად გაუფორმეს საქართველოს რამდენიმე მოქალაქეს. ბრიტანეთის საელჩოს ინფორმაციით, საუბარია მინიმუმ 70 მლნ დოლარის ფინანსურ ტრანზაქციებზე. სანქცირებული კომპანიები ამ ქსელის ნაწილია და კრიპტო გაცვლის პლათფორმებს იყენებდნენ რუსეთისთვის სანქციებისგან თავის არიდებაში დასახმარებლად. ფინანსთა სამინისტროს საგამოძიებო სამსახური ამტკიცებს, რომ ეს სქემა ბრიტანულ სანქციებამდე უკვე გაშიფრული ჰქონდა.
სამ კომპანიას შორიაა “რაპირა ჯგუფი”, ის საქართველოში ბრიტანეთის მოქალაქემ დააფუძნა 2022 წელს და ახლა ლიკვიდირებულია. გამოძიების ვერსიის მიხედვით, ეს კომპანიები რუსეთში, მოსკოვში ოპერირებდნენ და ოფისი ან აქტივები საქართველოში არ გააჩნდათ. დაკავებულები არ არიან კომპანიის მფლობელები, არამედ ორგანიზატორი, რომელსაც 9 წლიანი პატიმრობა აქვს მისჯილი. საგამოძიებო სამსახური ამტკიცებს, რომ განაჩენი აპრილში დადგა, მაშინ ჩნდება კითხვა, რატომ არ გაასაჯაროეს საგამოძიებო უწყებებმა ინფორმაცია ბრიტანული სანქციების დაწესებამდე?!