თავისუფლების მოედანზე დამოუკიდებლობის დღისადმი მიძღვნილი საზეიმო ღონისძიება მიმდინარეობს. 26 მაისის ღონისძიებას მიხეილ ყაველაშვილი, ირაკლი კობახიძე, შალვა პაპუაშვილი, მინისტრთა კაბინეტი და პარლამენტის დეპუტატები ესწრებიან. ღონისძიებას ასევე ესწრება სრულიად საქართველოს კათოლიკოს-პატრიარქი, უწმინდესი და უნეტარესი შიო III და სხვა სასულიერო პირები. გარდა ამისა, ღონისძიებაზე იმყოფებიან დიპლომატიური კორპუსის წარმომადგენლები, მათ შორის საქართველოში ევროკავშირის ელჩი პაველ ჰერჩინსკი.
დღეს წვევამდელები სამხედრო ფიცს დადებენ, რის შემდეგაც თავდაცვის ძალებს შეუერთდებიან. წვევამდელების ფიცის დადების ცერემონია თბილისის გარდა, საქართველოს 12 ისტორიულ ადგილას მოხდება.
თავისუფლების მოედანზე განლაგებულია სამხედრო ტექნიკა.
გენერლის, გრიგოლ ჭელიძის განცხადებით, სამხედრო ტექნიკა და შეიარაღება საქართველოს მასშტაბით, 21 ქალაქში გამოიფინა.
“ყველას გილოცავთ დამოუკიდებლობის აღდგენის დღეს – დღეს საქართველოს მასშტაბით 13 ქალაქში ახალწვეულები დადებენ ფიცს, მათ შორის თავისუფლების მოედანზე. ასევე 21 ქალაქში, თბილისის ჩათვლით, გამოფენილი იქნება სამხედრო ტექნიკა და შეიარაღება. მოსახლეობას საშუალება ექნება მთელი დღის განმავლობაში დაათვალიეროს ტექნიკა, გადაიღოს სურათები, გაეცნოს შეიარაღებასა და ტექნიკას და გაეცნოს მათ მონაცემებს. ეს დღე განსაკუთრებული დღეა თავდაცვის ძალებისთვის. ჩვენთან ყველაზე ახლოს დგას და ყოველთვის გვიხარია, რომ ამ დღეს მთელ საქართველოსთან და მოსახლეობასთან ერთად გავატარებთ”, – განაცხადა გენერალმა, გრიგოლ ჭელიძემ.
საქართველო დამოუკიდებლობის დღეს ყოველი წლის 26 მაისს აღნიშნავს. 1918 წლის 26 მაისს თბილისში, საქართველოს ეროვნულმა საბჭომ მიიღო „დამოუკიდებლობის აქტი“. ამით დასრულდა რუსეთის იმპერიის შემადგენლობაში ყოფნის 117-წლიანი პერიოდი, რომელიც 1801 წლის ანექსიით დაიწყო და შეიქმნა საქართველოს დემოკრატიული რესპუბლიკა.