ნინო ჯღარკავა მამუკა მდინარაძის ინიციატივას სოციალურ ქსელში ეხმაურება და წერს, რომ ამის შემდეგ საჩივრების წერის გარეშე შეძლებთ ხალხი ციხეში გაუშვას.
ჯღარკავა “ქართული ოცნების” გადაწყვეტილებას “შესანიშნავს” უწოდებს, რადგან მისი თქმით, თავად სამმართველო გააკეთებს იმას, რისი გაკეთებაც მოქალაქეებს უწევდათ, [საუბარია საჩივრების დაწერაზე.]
“ასემც კოხტად, აწი საჩივრების წერაც არ მომიწევს ისე გაგამგზავრებთ ციხეში ბევრს. შსს-ში შეიქმნება სამმართველო, რომლის ფუნქციაც საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და შესაბამისი სამართლებრივი რეაგირება იქნება. იგულისხმება ნებისმიერი ტიპის საჯარო კომუნიკაცია, რომელიც შეიცავს სიძულვილის ენას, შუღლის გაღვივებას, ღირსების შელახვას და სხვა.
პრინციპულად მნიშვნელოვანია, რომ აღნიშნული სამმართველო იმოქმედებს პროაქტიურ რეჟიმში და რეაგირება არ იქნება დამოკიდებული მხოლოდ მოქალაქის საჩივარზე. უწყება თავად განახორციელებს მონიტორინგს, შესაბამის სამართლებრივ შეფასებას და საჭიროების შემთხვევაში თავად გადააგზავნის მასალებს სასამართლოში- მამუკა მდინარაძე” – წერს ჯღარკავა.
შინაგან საქმეთა სამინისტროში იქმნება სპეციალური სამმართველო, რომლის ძირითადი ფუნქცია საჯარო სივრცეში გამოთქმული მოსაზრების სისტემური მონიტორინგი იქნება – განცხადება მამუკა მდინარაძემ საგანგებო ბრიფინგზე გააკეთა. მისი თქმით, იგულისხმება ნებისმიერი ტიპის საჯარო კომუნიკაცია, რომელიც შეიცავს სიძულვილის ენას, შუღლის გაღვივებას, ღირსების შელახვას და “სხვა მსგავს ქმედებებს”.