ბათუმში მოქალაქეები ქუჩაში სოციალურ სიდუხჭირესა და მძიმე საყოფაცხოვრებო პირობებს აპროტესტებდნენ. მასშტაბური მსვლელობის გამო ქალაქის რამდენიმე ცენტრალურ ქუჩაზე მოძრაობა დროებით შეფერხდა. აქციის მონაწილეები აჭარის მთავრობის ადმინისტრაციის შენობასთან შეიკრიბნენ და ხელისუფლებისგან დახმარებას ითხოვდნენ.
პროტესტში მონაწილეობდნენ სოციალურად დაუცველი და უსახლკარო მოქალაქეები, რომლებიც აცხადებენ, რომ წლებია საცხოვრებლისა და საბაზისო სოციალური პრობლემების მოგვარებას უშედეგოდ ელოდებიან. მათი თქმით, ქვეყანაში, სადაც მრავალმილიონიანი პროექტები ხორციელდება და ეკონომიკური მაჩვენებლები იზრდება, ასობით ოჯახი კვლავ მძიმე პირობებში ცხოვრობს.
აქციის მონაწილეები ამბობენ, რომ უკიდურესმა გაჭირვებამ ისინი პროტესტის ამ ფორმამდე მიიყვანა. მათი განცხადებით, ხელისუფლება მოქალაქეების პრობლემებით არ ინტერესდება. პროტესტის მონაწილეები ასევე ამტკიცებენ, რომ აჭარის მთავრობის ახალ ხელმძღვანელთან, ზურაბ პატარაძესთან, შეხვედრა ვერ შეძლეს — ადმინისტრაციულ შენობასთან მისულ მოქალაქეებს კარი დაკეტილი დახვდათ, ადგილზე კი მობილიზებული იყო პოლიცია.