სამართლიანი სასამართლოს უფლების დარღვევის მოტივით სუს-ის ყოფილ ხელმძღვანელს საქმეს სტრასბურგში მიაქვს. გრიგოლ ლილუაშვილის ადვოკატები ამტკიცებენ, რომ პროკურატურა საქმეში არსებულ მნიშვნელოვან მტკიცებულებებს მალავს და ბრალდებულის სასარგებლოდ მიცემული ჩვენებები საქმის მასალებში არ ფიგურირებს. სწორედ ამ გარემოებებზე დაყრდნობით, ივანიშვილის გუნდის ერთ დროს გავლენიანი ფიგურა სამართლებრივი დავის ევროპულ დონეზე გაგრძელებას გეგმავს.
დღეს სასამართლოში სახელმწიფო ბრალდებას პასუხის გაცემა მოუწია კითხვაზე — სად არის ის ჩვენებები, რომლებზეც დაცვის მხარე საუბრობს.
ლილუაშვილის ადვოკატები კი ამტკიცებენ, რომ პროკურატურა სიმართლეს არ ამბობს. მათი განცხადებით, სწორედ ამიტომ გახდა საჭირო იმ მოწმეების დამოუკიდებლად მოძიება, რომელთა ჩვენებებიც, მათი თქმით, გამოძიებამ საქმის მასალებიდან გამოტოვა. დაცვის მხარე ამბობს, რომ მოგვიანებით მოსამართლეს სწორედ ამ პირების დაკითხვაც სთხოვეს.
ვიდრე გრიგოლ ლილუაშვილი საქმეს ოფიციალურად ევროსასამართლოში მიიტანს, მას ქვეყნის შიგნით არსებული ყველა სამართლებრივი ინსტანციის გავლა მოუწევს. სუს-ის ყოფილი ხელმძღვანელის სასამართლო პროცესი დახურულ რეჟიმში მიმდინარეობს. ადვოკატებს კონფიდენციალურობის დოკუმენტზე ხელის მოწერაც მოუხდათ, რის გამოც დაცვის მხარე ამბობს, რომ საქმეზე საჯარო განმარტებების შესაძლებლობა მნიშვნელოვნად შეზღუდულია. დღეს სასამართლომ ე.წ. ბაგა-ბაღების საქმის ფარგლებში კიდევ ორ მოწმეს მოუსმინა.