სოციალურ ქსელში ჰამიდ ბუკოვსკი გარდაბანში ავარიის შედეგად დაღუპული ახალგაზრდების შესახებ პოსტს აქვეყნებს:
“ნელ-ნელა გამოვდივარ შოკიდან. როგორც უკვე გითხარით, დღეს გარდაბანში მომხდარი ავარიის შედეგად დაღუპული ბავშვებიდან ოთხი ჩემი ყოფილი მოსწავლეა.
იმით დავიწყებ, რომ ძალიან საშიში გახდა გარდაბანში მანქანის ტარება კი არა ქვეითობაც. ძალიან გახშირდა საგზაო ავარიების რაოდენობა. მე, როგორც მოქალაქე, როგორც შვილი, როგორც მამა, როგორც მეუღლე, როგორც ძმა – ძალიან ვბრაზდები და განვიცდი ამას.
გარდაბანში ყველამ დაგიდასტურებთ თუ როგორი სიჩქარით დადიან მანქანები. ის თუ როგორი “ბამბეია” გარდაბანი. ის თუ როგორ ატარებს ზოგი მანქანას “მართვის მოწმობის” გარეშე. ის თუ როგორი ელვისებური სიჩქარით დადიან და ეს რომ საამაყოდ მიაჩნიათ. ის თუ როგორ ატარებენ ზოგი წართმეული მართვის მოწმობის მოუხედავად.
როდემდე უნდა გაგრძელდეს ეს მარაზმი და სიგიჟე და ამისი პოპულარიზაცია ? ამ ყველაფერზე “თვალის დახუჭვა” როდემდე უნდა გაგრძელდეს ?
რამდენი უნდა დაიღუპოს რომ გავიგოთ შესაბამისმა უწყებებმა, მშობლებმა, საზოგადოებამ რომ ასე ვერ გაგრძელდება ?
მე, როგორც მასწავლებელი, ვხედავ როგორი წყურვილით ეჩქარებათ 16-17-18 წლის ბავშვებს მართვის მოწმობის აღება. ერთი სული აქვთ ის თუ როდის აიღებენ ამ წყეულ მართვის მოწმობას და როდის “იდრიფტავებენ” .
ეს პრობლემა ხომ საჭიორებს მასშტაბურ ღონისძიებებსა და ცნობიერების ამაღლებას.
მართვის მოწმობის ფეტიში, დრიფტაობის სურვილი, სიჩქარის მოყვარულობა – ამ ყველაფერს შობს ის სიცარიელე რომელიც მოზარდებსა და ახალგაზრდებშია.
ვკითხე ერთ-ერთ მე-12-ე კლასელ მოსწავლეს ის თუ რატომ ამხელა წყურვილით ნატრობს მართვის მოწმობას, დრიფტსა და ტარებას. პასუხი :
– აბა გარდაბანში სხვა რა უნდა ვქნა მასწ?” – წერს სოციალურ ქსელში ჰამიდ ბუკოვსკი.
ავარია გარდაბანში დღეს მოხდა. შედეგად 7 ახალგაზრდა დაიღუპა, ერთი კი მძიმედ დაშავდა. ავარიის შედეგად დაღუპულთა შორის არიან ძმები, ალილ და საჰირ ჯალილოვები; ასევე, 17 და 19 წლის შამილ და ქამილ ალიევები. ისინი ერთმანეთის ნათესავები იყვნენ.