ევროპარლამენტის მხრიდან აკრძალვა ამ ეტაპზე მხოლოდ TV იმედს ეხება. რუსთავი 2-სა და Pos TV-ის გაეგზავნათ გაფრთხილება, რომ შესაძლოა, მათაც იგივე სანქცია დაუწესდეთ – ამის შესახებ ევროპარლამენტის წარმომადგენელმა ელენე მეტრეველმა განაცხადა.
„ევროპარლამენტის მხრიდან აკრძალვა ამ ეტაპზე მხოლოდ TV იმედს ეხება. რუსთავი 2-სა და Pos TV-ის გაეგზავნათ გაფრთხილება, რომ მსგავსი შემთხვევის განმეორებისას, შესაძლოა, მათაც იგივე სანქცია დაუწესდეთ. ამასთან, მუდმივი აკრედიტაცია არც მათ აქვთ და მათი მოთხოვნა ჯერ კიდევ განხილვის პროცესშია. ვნახოთ, როგორ განვითარდება მოვლენები.
ასევე ვიცით, რომ „რუსთავი 2“ და „პოსტივი“ „იმედის“ სატელიტები არიან. თუ 1 წლის განმავლობაში „იმედს“ არ ექნება ევროპარლამენტში ოპერირების საშუალება, ამ საქმიანობას სწორედ ისინი გააგრძელებენ, ამიტომ მათთან დაკავშირებულ სანქციებსაც ძალიან აქტიურად განვიხილავთ“ – ამბობს ნეტგაზეთთან საუბრისას ევროპარლამენტის წარმომადგენელი ელენე მეტრეველი.
გუშინ TV იმედმა გაავრცელა ინფორმაცია, რომ ევროპარლამენტმა საქმიანობა 1 წლით აუკრძალა, მოლდოვამ კი სამ ქართულ მაუწყებელს – TV იმედი, რუსთავი 2 და Pos TV-ის ევროპის საბჭოს მინისტრთა კომიტეტის სესიაზე დასასწრებად აკრედიტაციაზე უარი უთხრა. საქართველოს საგარეო საქმეთა სამინისტროც იქნება წარმოდგენილი. მოგვიანებით, პოლონელმა ევროპარლამენტარმა კშიშტოფ ბრეიზამ X-ზე დაწერა: „საქართველოში რეჟიმის პრორუსულ რუპორებს (ტელეკომპანია იმედს, რუსთავი 2-სა და Pos TV-ის) დღეს ევროპარლამენტში შესვლა აეკრძალათ. ამის შესახებ მოთხოვნა მე და ჩემი გუნდის აღმოსავლეთ პოლიტიკის კოორდინატორმა ელენე მეტრეველმა წარვადგინეთ“.