სასამართლო პროცესზე, სადაც ალეკო ელისაშვილის საქმის განხილვა მიმდინარეობდა, დღეს საქმის გამომძიებელი ილონ კორძაია გამოიკითხა. კორძაია, რომელმაც სასამართლოს კანცელარია დაათვალიერა, ამტკიცებს, რომ შემთხვევის ადგილას არა ბენზინის ბოთლები არამედ, ბენზინის ბოცები დახვდა.
მეტიც, დღეს პროკურატურის მოწმემ სხდომაზე ირწმუნებოდა, რომ ბრალდებულ პოლიტიკოს თმით სავსე წინდაც ჰქონდა სასამართლოში მიტანილი, იმისთვის რომ ცეცხლი წაეკიდებინა.
“როდესაც მივედი, იატაკზე იდო იარაღი და ხელთათმანები. მაგიდებზე და იატაკზე დასხმული იყო სავარაუდოდ, ბენზინი. ასევე, იქვე იყო დიდი ჩანთა, საიდანაც ბევრი ნივთი იქნა ამოღებული: რევოლვერი, მჭიდი, ხელთათმანები, სანთებელა, მცირე ჩანთა, სადაც შეშის ფრაგმენტები იყო ჩალაგებული. იქვე იდო ბენზინით სავსე ბოცები და ცარიელი ბოთლები. ასევე იყო წინდა, რომელშიც თმა იდო… იარაღი კი მთავარ ოთახში იყო იატაკზე მოთავსებული, რომელშიც იდო მჭიდი, მასში კი ტყვიები იყო მოთავსებული“, – განაცხადა ილონ კორძაიამ.
ალეკო ელისაშვილის ადვოკატმა, გიორგი რეხვიაშვილმა მოწმეს უთხრა, რონ ბოცები 20 ლიტრიანი წარმოუდგენია და სთხოვა განემარტა, თუ რას გულისხმობდა ბოცებში.
სიზუსტისკენ მოუწოდა გამომძიებელს მოსამართლემაც.
რაც შეეხება ალეკო ელისაშვილს, მას ილონ კორძაიასგან აინტერესებდა, რას გულისხმობდა წინდაში – “კი მაგრამ, ფეხზე წინდა არ გაცვიათ?”
მთავარ გამომძიებლს, რომელმაც თავდაპირველად საქმეზე გამოძიება სხვისი ნივთის დაზიანების ფაქტზე დაიწყო დღეს კითხვები დასუვა ასევე ალეკო ელისაშვილის ადვოკატმა, არჩილ ჩოფიკაშვილმააც და ჰკითხა, კვალიფიკაციასთან დაკავშირებით ჰქონდა თუ არა კითხვები, როგორც მას, ისე ზედამხევდელ პროკურორს, რაზეც ილონ კორძაიამ განაცხადა რომ მას კვალიფიკაციაზე კითხვები არ გასჩენია.
ელისაშვილი 2025 წლის 29 ნოემბერს, თბილისის საქალაქო სასამართლოს კანცელარიის დაწვის მცდელობის ბრალდებით დააკავეს და ბრალი “სისხლის სამართლის კოდექსის“ 323-ე მუხლით წაუყენეს, რაც ტერორისტული აქტის მცდელობას გულისხმობს.
2026 წლის მარტში კი, მას ბრალი მეორე ეპიზოდზე წარედგინა. პროკურატურა ამტკიცებს, რომ ალეკო ელისაშვილმა თბილისის სასამართლოს შენობაში ცეცხლის გაჩენა 2025 წლის 4 მაისსაც სცადა.