წლების წინ კორუფციის რისკების მოტივით გაუქმებული პრემია-დანამატების სისტემა „ქართულ ოცნებას“ ისევ უკან აბრუნებს – შეკითხვაზე, რატომ გახდა საჭირო იმავე მექანიზმის აღდგენა, რომელიც “ოცნების” ხელისუფლებამ კორუფციის რისკების მოტივით თავადვე შეზღუდა, „ქართული ოცნების“ დეპუტატი ვასილ ჩიგოგიძე პასუხობს, რომ „ჯილდოსა“ და კორუფციას ერთმანეთთან კავშირი არ აქვს. ინფორმაციას “ტვ პირველი” ავრცელებს.
“სად ჯილდო, სად კორუფცია? ჯილდო არის წახალისება ადამიანის წარმატებებისთვის ად კორუფცია სულ სხვა რაღაცაა”, – ამბობს ვასილ ჩიგოგიძე.
„ქართული ოცნება“ საჯარო სექტორში პრემია-დანამატების დაბრუნებას გეგმავს. საკანონმდებლო ინიციატივას პარლამენტი სავარაუდოდ ხვალ განიხილავს. ცვლილებების მიხედვით, ის სისტემა, რომელიც წლების წინ კორუფციის რისკების მოტივით შეიზღუდა, კვლავ ამოქმედდება.
ინიციატივის თანახმად, მერების, მინისტრების მოადგილეებისა და სახელმწიფო რწმუნებულების დამატებითი ფინანსური წახალისება ისევ შესაძლებელი გახდება, თუმცა ახალი ფორმულირებით — პრემიის ნაცვლად მას „ჯილდო“ ეწოდება.