სამოქალაქო აქტივისტმა, დუტა ჯავახიშვილმა, რომელსაც შინაგან საქმეთა სამინისტრო 7 თებერვალს გზის სავალ ნაწილს ხელოვნურად გადაკეტვას ედავება, მოსამართლე ცაცუას საკუთარი დიპლომი მიუტანა.
როგორც ჯავახიშვილმა თქვა, მოსამართლემ წინა სასამართლო სხდომაზე მის განათლებაში ეჭვი შეიტანა, რის გამოც მან გადაწყვიტა, რომ ამის დამადასტურებლად დიპლომი ეჩვენებინა.
“მანუჩარ ცაცუას მიაჩნია, რომ ვერ ვიაზრებ, თუ რატო გამოვდივარ რუსთაველზე, რას ვაპროტესტებ და რა მინდა. წინა სასამართლოზე მოწმეს ჰკითხა, იცოდა თუ არა ჩემი განათლების შესახებ და მაქვს თუ არა დიპლომი. დღეს მე დიპლომი მოვიტანე. ამ რეპრესიებს არ ვუშინდებით, გამოვდივართ ყოველ დღე”, – განაცხადა ჯავახიშვილმა.
მოსამართლე მანუჩარ ცაცუამ შშმ დემონსტრანტის, დუტა ჯავახიშვილის საქმის განხილვა დაასრულა და გადაწყვეტილებას 15 მაისს გამოაცხადებს. როგორც შშმ პირს, დუტას ადმინისტრაციულ პატიმრობას ვერ შეუფარდებენ. მოსამართლემ უნდა გადაწყვიტოს, შშმ ახალგაზრდას სიტყვიერ შენიშვნას მისცემს თუ 5000 ლარის გადახდას დააკისრებს. შსს დუტას დაჯარიმებას ითხოვს.