რუსეთში ე.წ. „ფეიკების“ საქმეზე ტელეარხ „დოჟდის“ მთავარ რედაქტორს, ტიხონ დზიადკოს დაუსწრებლად 8 წლით პატიმრობა მიუსაჯეს. მოსკოვის სასამართლომ ჟურნალისტი დამნაშავედ ცნო რუსული არმიის შესახებ „ცრუ ინფორმაციის“ გავრცელებაში.
ბრალდების საფუძველი გახდა დზიადკოს სოციალური ქსელების პოსტები, სადაც საუბარი იყო ბუჩასა და ირპენში მშვიდობიანი მოსახლეობის მკვლელობებზე. სასამართლომ მას დამატებით 250 ათასი რუბლის ჯარიმა და ოთხი წლით საიტების ადმინისტრირების აკრძალვაც შეუფარდა.
ომის დაწყების შემდეგ „დოჟდი“ რუსეთში „არასასურველ ორგანიზაციად“ გამოცხადდა, ხოლო არხის არაერთ ჟურნალისტს, მათ შორის ეკატერინა კოტრიკაძეს, „უცხოეთის აგენტის“ სტატუსი მიენიჭა. თავად კოტრიკაძესაც რამდენიმე თვის წინ იგივე ბრალდებით დაუსწრებლად 8-წლიანი პატიმრობა მიუსაჯეს.
რუსეთში არმიის შესახებ ე.წ. „ფეიკების“ გავრცელების მუხლი 2022 წელს, უკრაინაში სრულმასშტაბიანი შეჭრის შემდეგ დაამატეს. ამ მუხლით ქვეყანაში უკვე ათობით ჟურნალისტი, აქტივისტი და კრიტიკოსია გასამართლებული.