ოკუპირებულ ცხინვალში, ე.წ. შსს-ს სამმართველოს შენობასთან, სავარაუდოდ მთვრალი ე.წ. სამართალდამცველები ერთმანეთს ფიზიკურად გაუსწორდნენ – დაპირისპირების ამსახველი ვიდეოკადრები და ინფორმაცია ადგილობრივი Telegram-არხით ვრცელდება.
ამავე ცნობით, შემთხვევა შაბათს, გვიან ღამით მოხდა და მიზეზი ავტოსაგზაო შემთხვევა გახდა. წყაროებზე დაყრდნობით, Telegram-არხი Осетия წერს, რომ ავტოსაგზაო შემთხვევის მონაწილეები ერთ-ერთი “ძალოვანი სტრუქტურის” თანამშრომლები იყვნენ; გავრცელებული ინფორმაციით, ავარიის შემდეგ ისინი შემთხვევის ადგილიდან მიმალვას ცდილობდნენ, თუმცა “საქალაქო სამმართველოს” თანამშრომლებმა დააკავეს. ამის შემდეგ, დაკავებულების მეგობრებმა და კოლეგებმა მილიციის შენობასთან შეკრება დაიწყეს და მათი გათავისუფლება მოითხოვეს. ვითარება იმდენად გამწვავდა, რომ მილიციას გამაფრთხილებელი გასროლა მოუწია. ორი დაკავებული იზოლატორში იმყოფება.