მგზავრობა შიდა ქართლში მიმავალი მოქალაქეებისთვის გაძვირდა. თბილისიდან გორის მიმართულებით და პირიქით გადაადგილების საფასური გაიზარდა როგორც სამარშრუტო ტაქსებზე, ისე მინივენებზე. ინფრომაციას “ტვ პირველი” ავრცელებს.
თუ აქამდე მგზავრები გორში ჩასვლას 5 ლარად ახერხებდნენ, ახლა მგზავრობის ღირებულება 7 ლარი გახდა. გაიზარდა მინივენით გადაადგილების ფასიც — მგზავრებს უკვე 10 ლარის გადახდა უწევთ.
მოქალაქეები აცხადებენ, რომ მგზავრობის გაძვირება მათ ყოველდღიურ ხარჯებს მნიშვნელოვნად ზრდის, განსაკუთრებით მათთვის, ვინც თბილისსა და გორს შორის რეგულარულად გადაადგილდება.
“რატომ გაძვირდა, ეგ უნდა ჰკითხოთ პრემიერ-მინისტრს. საწვავის გამო ყველაფერი გაძვირებულია, საბურავი გინდა, რა გინდა – ყველაფერი გაძვირებულია. სახელმწიფო არ ანაღვლებს არაფერ, გინდა მძღოლი იყოს, გინდ მაღაზია, ტყუილად აზრი არა ქვს ლაპარაკს”, – ამბობს მოქალაქე.
“პროდუქცია, ყველაფერი გაძვირებულია. სახელმწიფომ უნდა იზრუნოს, აქციზი უნდა მოაკლონ, ცოტა სახელმწიფოს, ცოტა ხალხს”, – ამბობს კიდევ ერთი მოქალაქე.
ბოლო პერიოდში რეგიონების მიმართულებით ტრანსპორტის გაძვირების ტენდენცია სხვა მიმართულებებზეც დაფიქსირდა — მათ შორის ჭიათურის, ბაკურიანისა და კახეთის მიმართულებით.